അജയന്റെ രണ്ടാം മോഷണം എന്ന ബ്ലോക്ക്ബസ്റ്റർ ചിത്രത്തിലൂടെ മലയാളത്തിന്റെ യുവതലമുറയിലെ സൂപ്പർതാര നിരയിലേക്ക് ഉയർന്നിരിക്കുകയാണ് ടോവിനോ തോമസ്. ജിതിൻ ലാൽ ഒരുക്കിയ ഈ ചിത്രത്തിൽ മൂന്ന് വ്യത്യസ്ത കഥാപാത്രങ്ങളെയാണ് ടോവിനോ തോമസ് അവതരിപ്പിച്ചത്. അതിലൂടെ ഒരു നടനെന്ന നിലയിലും തന്റെ പ്രതിഭ വരച്ചിടുന്നുണ്ട് ഈ നടൻ.
ഒരു നടനെന്ന നിലയിൽ തന്നെ എല്ലാക്കാലത്തും പ്രചോദിപ്പിച്ചിട്ടുള്ളത് മോഹൻലാൽ, മമ്മൂട്ടി എന്നിവരാണെന്നും ഇന്നും അവരിൽ നിന്ന് പഠിച്ചത് തന്നെയാണ് താൻ അഭിനേതാവ് എന്ന നിലയിൽ ഉപയോഗിക്കുന്നതെന്നും ടോവിനോ പറയുന്നു. അടുത്തിടെ നൽകിയ ഒരു റേഡിയോ അഭിമുഖത്തിൽ മമ്മൂട്ടി, മോഹൻലാൽ എന്നിവരെ കുറിച്ച് ടോവിനോ പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്.
മമ്മൂട്ടിയിൽ നിന്നും മോഹൻലാലിൽ നിന്നും എന്തെങ്കിലും കാര്യം ടോവിനോക്ക് കിട്ടണം എന്ന് ആഗ്രഹം ഉണ്ടെങ്കിൽ അതെന്താണ് എന്നായിരുന്നു അവതാരകന്റെ ചോദ്യം. അതിന് ടോവിനോ പറയുന്നത് മമ്മൂട്ടിയിൽ നിന്ന് തനിക്ക് വേണ്ടത് അദ്ദേഹത്തിന്റെ ബുദ്ധി ആണെന്നാണ്. അദ്ദേഹം സിനിമാ തിരഞ്ഞെടുപ്പിലടക്കം കാണിക്കുന്ന ബുദ്ധിയും ഇൻഡസ്ട്രി മാറുന്നതിനു അനുസരിച്ച് സ്വയം മാറാനും കാണിക്കുന്ന ബുദ്ധിയുമാണ് തനിക്ക് വേണ്ടതെന്നും ടോവിനോ പറയുന്നു.
ലാലേട്ടനിൽ നിന്ന് ലഭിക്കാൻ താൻ ആഗ്രഹിക്കുന്നത് അദ്ദേഹത്തിന്റെ അഭിനയ മികവും എല്ലാ കാര്യങ്ങളെയും ശാന്തമായി നേരിടുന്ന പ്രകൃതവും അദ്ദേഹത്തിന്റെ ആകർഷണീയതയും വ്യക്തിപ്രഭാവവുമാണെന്നും ടോവിനോ പറയുന്നു. മോഹൻലാലിനൊപ്പം കൂതറ, ലൂസിഫർ എന്നീ ചിത്രങ്ങളിൽ വേഷമിട്ട ടോവിനോ ഇപ്പോൾ എമ്പുരാൻ എന്ന ചിത്രത്തിലും അദ്ദേഹത്തോടൊപ്പം അഭിനയിക്കുന്നുണ്ട്.
