കഴിഞ്ഞ വർഷം ഡിസംബറിൽ റിലീസ് ചെയ്ത് സൂപ്പർ വിജയം നേടിയ, തെലുങ്കു സൂപ്പർ താരം നന്ദമൂരി ബാലകൃഷ്ണ എന്ന ബാലയ്യയുടെ ബിഗ് ബഡ്ജറ്റ് ചിത്രമാണ് അഖണ്ഡ. ബോക്സ് ഓഫീസിൽ ആദ്യമായി ബാലയ്യക്ക് നൂറു കോടി കളക്ഷൻ നേടിക്കൊടുത്ത ചിത്രമെന്ന പ്രത്യേകതയും അഖണ്ഡക്കുണ്ട്. ഒരു മാസ്സ് ആക്ഷൻ എന്റെർറ്റൈനെർ ആയൊരുക്കിയ അഖണ്ഡ, സിംഹ, ലെജൻഡ് എന്നീ ചിത്രങ്ങൾക്ക് ശേഷം ബാലയ്യ- ബോയപ്പട്ടി ശ്രീനു ടീം ഒന്നിച്ച ചിത്രം കൂടിയായിരുന്നു. ഈ കൂട്ടുകെട്ടിന് ഹാട്രിക്ക് വിജയം നേടിക്കൊടുത്ത അഖണ്ടയിൽ ബാലയ്യ കൂടാതെ പ്രഘ്യാ ജൈസ്വാൾ, ശ്രീകാന്ത് എന്നിവരും നിർണ്ണായകമായ വേഷങ്ങൾ ചെയ്തിരുന്നു. ഇപ്പോഴിതാ ഈ ചിത്രത്തിന് ഒരു രണ്ടാം ഭാഗം വരുമെന്ന് ഉറപ്പ് തന്നിരിക്കുകയാണ് ബാലയ്യ. ചിത്രത്തിന്റെ തിരക്കഥ പൂർത്തിയായി എന്നും പ്രൊഡക്ഷൻ എന്ന് തുടങ്ങണമെന്ന് വൈകാതെ തീരുമാനിക്കുമെന്നും അദ്ദേഹം പറയുന്നു. ദ്വാരക ക്രിയേഷൻസിന്റെ ബാനറിൽ മിര്യാല രവിന്ദർ റെഡ്ഢിയാണ് അഖണ്ഡ എന്ന ചിത്രം നിർമ്മിച്ചത്.
ബാലയ്യയുടെ കിടിലൻ ആക്ഷൻ രംഗങ്ങളും തമൻ എസ് ഒരുക്കിയ സംഗീതവുമാണ് അഖണ്ഡയുടെ ഹൈലൈറ്റുകൾ എന്നാണ് പ്രേക്ഷകരും നിരൂപകരും അഭിപ്രായപ്പെട്ടത്. ഒറ്റിറ്റി റിലീസിന് ശേഷവും, ഏറ്റവും കൂടുതൽ കാഴ്ചക്കാരെ ലഭിച്ച ബാലയ്യ ചിത്രമായി അഖണ്ഡ മാറിയിരുന്നു. രാഷ്ട്രീയവും സാമൂഹികവുമായി നിരവധി വെല്ലുവിളികൾ നേരിടുന്ന കഥാപാത്രമായാണ് രണ്ടാം ഭാഗത്തിൽ അഖണ്ഡ എത്തുക എന്നാണ് സൂചന. ഗോപിചന്ദ് മലിനേനി സംവിധാനം ചെയ്ത വീരസിംഹ റെഡ്ഢി ആണ് ബാലയ്യയുടെ അടുത്ത റിലീസ്. മാസ്സ് ആക്ഷൻ ചിത്രമായി ഒരുക്കിയ വീര സിംഹ റെഡ്‌ഡി ഈ വരുന്ന ജനുവരിയിൽ സംക്രാന്തി റിലീസായി പ്രേക്ഷകരുടെ മുന്നിലെത്തും.
