ദളപതി വിജയ് നായകനായി അഭിനയിച്ചു കൊണ്ടിരിക്കുന്ന ഏറ്റവും പുതിയ ചിത്രമാണ് വാരിസ്. ദേശീയ പുരസ്‍കാരമടക്കം നേടിയ സൂപ്പർ ഹിറ്റ് മഹേഷ് ബാബു ചിത്രം മഹർഷിയുൾപ്പെടെ സംവിധാനം ചെയ്ത വംശിയാണ് വിജയ്‌യുടെ ഈ അറുപത്തിയാറാം ചിത്രം സംവിധാനം ചെയ്യുന്നത്. വംശി, ഹരി, അഹിഷോർ സോളമൻ എന്നിവർ ചേർന്ന് രചിച്ച ഈ പുതിയ ചിത്രം നിർമ്മിക്കുന്നത് പ്രശസ്ത തെലുങ്ക് നിർമ്മാതാവായ ദിൽ രാജുവാണ്. അടുത്ത വർഷം പൊങ്കൽ റിലീസ് ആയാണ് വാരിസ് പ്രേക്ഷകരുടെ മുന്നിലെത്തുന്നത്. ഇതിന്റെ മൂന്നു പോസ്റ്ററുകൾ ഇപ്പോൾ തന്നെ സോഷ്യൽ മീഡിയയിൽ വൈറലാണ്. രശ്‌മിക മന്ദാന നായികാ വേഷം ചെയ്യുന്ന ഈ ചിത്രത്തിൽ പ്രകാശ് രാജ്, പ്രഭു, ശാം, യോഗി ബാബു, ജയസുധ എന്നിവരും അഭിനയിക്കുന്നുണ്ട്. എന്നാൽ ഇപ്പോഴിതാ, അടുത്ത പൊങ്കലിന് ഈ ചിത്രത്തോടേറ്റു മുട്ടാൻ നടിപ്പിൻ നായകൻ സൂര്യയെ നായകനാക്കി ബാല ഒരുക്കുന്ന ചിത്രം വരികയാണെന്ന റിപ്പോർട്ടുകളാണ് ലഭിക്കുന്നത്.
സൂര്യ തന്നെ നിർമ്മിക്കുന്ന ഈ ചിത്രത്തിൽ അദ്ദേഹം ഇരട്ട വേഷത്തിലാണ് എത്തുന്നതെന്നും സൂചനയുണ്ട്. പിതാമഹൻ, നന്ദ എന്നീ ക്ലാസിക് ചിത്രങ്ങൾക്ക് ശേഷം ബാല- സൂര്യ ടീം ഒന്നിക്കുന്ന ചിത്രമാണിത്. ഇപ്പോൾ ഷൂട്ടിംഗ് പുരോഗമിക്കുന്ന ഈ ചിത്രത്തിൽ കൃതി ഷെട്ടി, മമിതാ ബൈജു എന്നിവരും അഭിനയിക്കുന്നുണ്ട്. സൂര്യയുടെ ഭാര്യയും നടിയുമായ ജ്യോതികയും ഈ ചിത്രത്തിൽ അഭിനയിക്കുന്നുണ്ടെന്നാണ് സൂചന. ഏതായാലും ഈ രണ്ടു ചിത്രങ്ങളും നേർക്ക് നേർ വന്നാൽ ഒരു വലിയ ബോക്സ് ഓഫീസ് പോരാട്ടമായിരിക്കും നമ്മൾ കാണാൻ പോകുന്നത്. വിജയ് നായകനാവുന്ന വാരിസിൽ തെലുങ്ക് സൂപ്പർ താരം മഹേഷ് ബാബു അതിഥി വേഷത്തിലുമുണ്ടെന്നു വാർത്തകൾ വന്നിരുന്നു.
