തന്റെ അഭിനയമികവുകൊണ്ട് ചുരുങ്ങിയ കാലയളവിനുള്ളിൽ തന്നെ ശ്രദ്ധേയയായ നടിയാണ് പാർവതി മേനോൻ. 2006 ൽ നോട്ട് ബുക്ക് എന്ന ചിത്രത്തിലൂടെ മലയാള സിനിമയിൽ അരങ്ങേറിയ നടിയാണ് പാർവതി. ആദ്യ ചിത്രത്തിലെ തന്നെ മികച്ച പ്രകടനം പാർവതിയെ വളരെയധികം ശ്രദ്ധേയയാക്കിയിരുന്നു. പിന്നീട് ദിലീപ്, മോഹൻലാൽ എന്നിവരോടൊപ്പം ചുരുങ്ങിയ കാലയളവിൽ തന്നെ അഭിനയിക്കുവാനും പാർവതിക്കായി. തുടർന്ന് പാർവതി പിന്നീട് തമിഴിലും കന്നഡയിലും തന്റെ സാന്നിധ്യം അറിയിച്ചു. ഒരിടവേളക്ക് ശേഷം തിരിച്ചെത്തിയ പാർവതി മലയാളത്തിൽ മികച്ച ചിത്രങ്ങളിലൂടെ ശ്രദ്ധേയയായിരുന്നു. കസബ എന്ന ചിത്രത്തെ കുറിച്ച് പാർവതി നടത്തിയ പരാമർശവും അതിന് ശേഷം സോഷ്യൽ മീഡിയയിൽ ഉണ്ടായ വലിയ ചർച്ചകൾക്കും ശേഷം വീണ്ടും സോഷ്യൽ മീഡിയയിൽ പാർവ്വതി ചർച്ചയാവുകയാണ്.
കഴിഞ്ഞ ദിവസമാണ് പാർവതി തന്റെ പുത്തൻ ലുക്കിൽ പ്രത്യക്ഷപ്പെട്ടത്. ഇൻസ്റ്റഗ്രാമിലൂടെയാണ് തന്റെ വ്യത്യസ്‍തമായ ഹെയർ സ്‌റ്റൈലുമായി പാർവതി എത്തിയത്. ചുരുങ്ങിയ സമയത്തിനുള്ളിൽ തന്നെ പാർവതിയുടെ പുതിയ ലുക്ക് വലിയ ചർച്ചയായി മാറി. ബാംഗ്ലൂർ ഡെയ്‌സിന് ശേഷം അഞ്ജലി മേനോൻ ഒരുക്കുന്ന ചിത്രത്തിന്റെ തിരക്കിലാണ് പാർവതി ഇപ്പോൾ. ചിത്രത്തിന് വേണ്ടിയുള്ള രൂപമാറ്റം ആണോ ഇതെന്നാണ് ആരാധകരുടെ സംശയം. ടെക്ക് ഓഫ് ആണ് അവസാനമായി പുറത്തിറങ്ങിയ പാർവതിയുടെ മലയാള ചിത്രം. ചിത്രത്തിലെ മികച്ച പ്രകടനത്തിന് ദേശീയ സംസ്ഥാന അവാർഡുകൾ പാർവ്വതി കരസ്ഥമാക്കിയിരുന്നു. പൃഥ്വിരാജ് നായകനായ മൈ സ്റ്റോറിയാണ് പാർവ്വതിയുടെതായി പുറത്തിറങ്ങാനിരിക്കുന്ന ഏറ്റവും പുതിയ ചിത്രം.
