യുവ താരം ടോവിനോ തോമസിനെ നായകനാക്കി പ്രശസ്ത നടനും സംവിധായകനുമായ മധുപാൽ സംവിധാനം ചെയ്ത ഒരു കുപ്രസിദ്ധ പയ്യൻ എന്ന ചിത്രം നാളെ മുതൽ പ്രദർശനം ആരംഭിക്കുകയാണ്. ഈ ചിത്രത്തിന് കേരളത്തിൽ മികച്ച റിലീസ് ആണ് ലഭിച്ചിരിക്കുന്നത്. ലാൽ- പൃഥ്വിരാജ് ടീമിനെ കേന്ദ്ര കഥാപാത്രങ്ങളാക്കി തലപ്പാവ് എന്ന ചിത്രം ഒരുക്കി സംവിധായകനായി അരങ്ങേറിയ മധുപാൽ പിന്നീട് ആസിഫ് അലി- ലാൽ ടീമിനെ വെച് ഒഴിമുറി എന്ന ചിത്രവും ചെയ്തിരുന്നു. ടോവിനോ തോമസ് ചിത്രമായ ഒരു കുപ്രസിദ്ധ പയ്യൻ മധുപാലിന്റെ മൂന്നാമത്തെ ചിത്രമാണ്. ആദ്യ രണ്ടു ചിത്രങ്ങളും വമ്പൻ നിരൂപക പ്രശംസ നേടിയത് കൊണ്ട് തന്നെ ഈ മധുപാൽ ചിത്രത്തിലും പ്രേക്ഷകർക്ക് വമ്പൻ പ്രതീക്ഷയാണ്. എന്നാൽ ഇത്തവണ കുറച്ചു കൂടി കൊമേർഷ്യൽ സെറ്റപ്പിൽ ഒരു ത്രില്ലർ ചിത്രമാണ് മധുപാൽ ഒരുക്കിയിരിക്കുന്നത് എന്ന് ഒരു കുപ്രസിദ്ധ പയ്യന്റെ ട്രൈലെർ നമ്മുക്ക് വ്യക്തമാക്കി തരുന്നു.
വി സിനിമാസ് നിർമ്മിച്ച ഈ ചിത്രം ഒരു മർഡർ മിസ്റ്ററിയാണ് നമ്മുടെ മുന്നിൽ അവതരിപ്പിക്കുന്നത് എന്നാണ് സൂചന. അനു സിതാര, നിമിഷ സജയൻ എന്നിവർ നായികാ വേഷങ്ങൾ ചെയ്യുന്ന ഈ ചിത്രത്തിലൂടെ പ്രശസ്ത തമിഴ് നടി ശരണ്യ പൊൻവണ്ണൻ വർഷങ്ങൾക്കു ശേഷം മലയാള സിനിമയിലേക്ക് മടങ്ങിയെത്തുകയാണ്. ജീവൻ ജോബ് തിരക്കഥ ഒരുക്കിയ ഈ ചിത്രത്തിൽ അലെൻസിയർ, നെടുമുടി വേണു, സുജിത് ശങ്കർ, സൈജു കുറുപ്പ്, സുധീർ കരമന, ബാലു വർഗീസ് , ജി സുരേഷ് കുമാർ, സിദ്ദിഖ് എന്നിവരും അഭിനയിക്കുന്നുണ്ട് . നൗഷാദ് ഷെരീഫ് ദൃശ്യങ്ങൾ ഒരുക്കിയ ഈ ചിത്രത്തിന് സംഗീതം പകർന്നത് ഔസേപ്പച്ചനും എഡിറ്റ് ചെയ്തിരിക്കുന്നത് വി സാജനും ആണ്.
