തെലുങ്ക് യുവ താരം നാനി നായകനായി എത്തുന്ന ആദ്യ പാൻ ഇന്ത്യൻ ചിത്രമാണ് ദസറ. ഇപ്പോഴിതാ ഈ ചിത്രത്തിന്റെ റിലീസ് തീയതി പുറത്തു വിട്ടു കൊണ്ട് റിലീസ് ചെയ്ത പോസ്റ്റർ സോഷ്യൽ മീഡിയയിൽ വൈറലായി മാറുകയാണ്. നാനിയുടെ ലുക്ക് തന്നെയാണ് ഇതിന്റെ ഹൈലൈറ്റ്. പുഷ്പ എന്ന ചിത്രത്തിലെ അല്ലു അർജുനെ അനുസ്മരിപ്പിക്കുന്ന ലുക്കിൽ പ്രത്യക്ഷപ്പെട്ടിരിക്കുന്ന നാനിക്കൊപ്പം ഈ പോസ്റ്ററിൽ സിൽക്ക് സ്മിതയുടെ ഫോട്ടോയും നമ്മുക്ക് കാണാൻ സാധിക്കും. നടി സിൽക്ക് സ്മിതയുടെ വലിയൊരു ചിത്രത്തിന് മുന്നിൽ നാനി ഇരിക്കുന്നതാണ് ഈ പോസ്റ്ററിൽ നമ്മുക്ക് കാണാൻ സാധിക്കുന്നത്. 2023 മാർച്ച് 30നാണ് ഈ ചിത്രം റിലീസ് ചെയ്യാൻ പോകുന്നത്. തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളിൽ റിലീസ് ചെയ്യാൻ പോകുന്ന ഈ ചിത്രത്തിലെ നായികാ വേഷം ചെയ്യുന്നത് കീർത്തി സുരേഷാണ്.
ഗോദാവരി കനിയിലെ സിങ്കേരണി കൽക്കരി ഖനിയിൽ സ്ഥിതി ചെയ്യുന്ന ഒരു ഗ്രാമത്തിൽ നടക്കുന്ന കഥയാണ് ഈ ചിത്രം പറയുന്നത്. ആക്ഷന് പ്രാധാന്യം നല്കിയൊരുക്കുന്ന ഈ ചിത്രം നാനിയുടെ കരിയറിലെ തന്നെ ഏറ്റവും വലിയ വിജയം നേടുമെന്നാണ് അണിയറ പ്രവർത്തകരുടെ പ്രതീക്ഷ. ശ്രീ ലക്ഷ്മി വെങ്കിടേശ്വര സിനിമാസിന്റെ ബാനറിൽ സുധാകർ ചെറുകുരി നിർമ്മിക്കുന്ന ഈ ചിത്രം, രചിച്ചു സംവിധാനം ചെയ്യുന്നത് ശ്രീകാന്ത് ഒഡേലയാണ്. സമുദ്രക്കനി, സായ് കുമാർ, സറീന വഹാബ് എന്നിവരും വേഷമിടുന്ന ഈ ചിത്രത്തിന് കാമറ ചലിപ്പിക്കുന്നത് സത്യൻ സൂര്യൻ, എഡിറ്റ് ചെയ്യുന്നത് നവീൻ നൂലി എന്നിവരാണ്. സന്തോഷ് നാരായണനാണ് ഈ ചിത്രത്തിന് വേണ്ടി സംഗീത സംവിധാനം നിർവഹിക്കുന്നത്.
