കംപ്ലീറ്റ് ആക്ടർ മോഹൻലാലിനെ നായകനാക്കി വൈശാഖ് സംവിധാനം ചെയ്ത മോൺസ്റ്റർ എന്ന ചിത്രം ഇന്ന് മുതൽ കേരളത്തിൽ പ്രദർശനം ആരംഭിച്ചു. കേരളത്തിലുടനീളം നൂറോളം ഫാൻസ്‌ ഷോകളോടെ ആരംഭിച്ച ഈ ചിത്രത്തിന് വമ്പൻ സ്വീകരണമാണ് മോഹൻലാൽ ആരാധകരും സിനിമാ പ്രേമികളും ചേർന്ന് നൽകിയത്. ഉദയ കൃഷ്ണ തിരക്കഥ രചിച്ച ഈ ചിത്രം ഒരു ത്രില്ലറാണെങ്കിലും, ഇതിന്റെ ആദ്യ പകുതി മുന്നോട്ട് നീങ്ങുന്നത് ഒരു ഫാമിലി എന്റെർറ്റൈനെർ എന്ന രീതിയിലാണ്. മോഹൻലാൽ അവതരിപ്പിക്കുന്ന ലക്കി സിങ് എന്ന കഥാപാത്രം കേരളത്തിലെത്തുന്നിടത്തു നിന്നാണ് ചിത്രം ട്രാക്കിലാവുന്നത്. രസകരമായ രീതിയിലാണ് മോഹൻലാൽ ഈ കഥാപാത്രത്തെ അവതരിപ്പിച്ചിരിക്കുന്നത്. ഷീ ടാക്സി ഡ്രൈവറായ ഹണി റോസ്, ഭർത്താവ് സുദേവ് നായർ, അവരുടെ കുട്ടിയുടെ ആയ കഥാപാത്രത്തെ അവതരിപ്പിക്കുന്ന ലക്ഷ്മി മൻചു എന്നിവരെയും ഈ ആദ്യ പകുതിയിൽ അവതരിപ്പിക്കുന്നുണ്ട്.
ചിത്രത്തിന്റെ ത്രില്ലർ മൂഡിലേക്കുള്ള ആദ്യത്തെ നീക്കം വരുന്നത് ആദ്യ പകുതിക്കു തൊട്ടു മുൻപാണ്. ഇന്റെർവലിനുള്ള കഥാമാറ്റത്തോടെ ഈ ചിത്രം പ്രേക്ഷകർക്ക് നൽകുന്ന ഫീൽ, ഉദ്വേഗഭരിതമായ ഒരു രണ്ടാം പകുതിയാണ് വരാൻ പോകുന്നതെന്നാണ്. ആദ്യ പകുതിയിലെ ചെറിയ ചെറിയ തമാശകളും കൊച്ചു കുട്ടിയോടൊപ്പമുള്ള മോഹൻലാലിന്റെ ഗാനവും തീയേറ്ററിൽ കയ്യടികൾ സൃഷ്ടിക്കുന്നുണ്ട്. ഏതായാലും കൂടുതൽ സീരിയസായ ഒരു രണ്ടാം പകുതിക്കു വേണ്ടിയുള്ള ഒരു ബിൽഡപ്പാണ് ഈ ആദ്യ പകുതിയെന്നാണ് സൂചന. ഒരു നിമിഷം പോലും ബോറടിപ്പിക്കാതെയാണ് മോൺസ്റ്റർ മുന്നോട്ടു പോകുന്നതെന്നാണ് ആദ്യ പകുതി കഴിയുമ്പോഴുള്ള പ്രേക്ഷക പ്രതികരണങ്ങൾ സൂചിപ്പിക്കുന്നത്. മോൺസ്റ്റർ വരവറിയിക്കുന്നു എന്നാണ് സോഷ്യൽ മീഡിയയും പറയുന്നത്.
