എഐ സാങ്കേതിക വിദ്യയുടെ സഹായത്തോടെ ഹോളിവുഡ് സിനിമകളിലെ കഥാപാത്രങ്ങൾക്ക് മലയാള സിനിമാതാരങ്ങളുടെ മുഖം നൽകുന്ന ചില ചിത്രങ്ങൾ സോഷ്യൽ മീഡിയയിൽ വൈറലായി മാറാറുണ്ട്. ഇപ്പോഴിതാ അങ്ങനെ വൈറലായി മാറുന്നത് മലയാളത്തിന്റെ മഹാനടൻ മോഹൻലാലിന്റെ എ ഐ ചിത്രങ്ങളാണ്. ഹോളിവുഡിലെ സൂപ്പർഹിറ്റ് കഥാപാത്രങ്ങളെ മോഹൻലാലിന്റെ മുഖത്തോടെ അവതരിപ്പിച്ചിരിക്കുന്ന ഈ ചിത്രങ്ങൾ ഇപ്പോൾ ട്രെൻഡിങ്ങാണ്.
റോക്കിയിലെ സിൽവസ്റ്റർ സ്റ്റാലിയോണ്‍ മുതൽ ടൈറ്റാനിക്കിലെ ഡികാപ്രിയോ കഥാപാത്രം ജാക്കിനും ടോപ് ഗൺ എന്ന സിനിമയിലെ ടോം ക്രൂസിനുമെല്ലാം പകരം മോഹൻലാലിൻറെ മുഖമാണ് ഈ എ ഐ ചിത്രങ്ങളിൽ ഉള്ളത്. ഇവ കൂടാതെ ക്ലാസിക് ആയ ഗോഡ്ഫാദർ, ജെയിംസ് ബോണ്ട്, ഇന്ത്യാന ജോൺസ്, സ്റ്റാർ വാർസ്, മാട്രിക്സ് തുടങ്ങിയ വമ്പൻ സിനിമകളിലെ കഥാപാത്രങ്ങൾക്കും എഐയുടെ സഹായത്തോടെ മോഹൻലാലിന്റെ മുഖം നൽകിയിട്ടുണ്ട്. എഐ.മാജിൻ എന്ന ഇൻസ്റ്റഗ്രാം ഹാൻഡിലിലൂടെയാണ് മോഹൻലാലിന്റെ ഈ പുത്തൻ ചിത്രങ്ങൾ പുറത്ത് വന്നത്.
‘ലാലേട്ടൻ അങ്ങ് ഹോളിവുഡിൽ ജനിച്ചിരുന്നെങ്കിൽ’ എന്ന കുറിപ്പോടെയാണ് ഈ ചിത്രങ്ങൾ സമൂഹ മാധ്യമങ്ങളിൽ വൈറലായി മാറുന്നത്. ഏതായാലും ഈ കിടിലൻ ചിത്രങ്ങൾ ഒരുക്കിയ എഐ ക്രിയേറ്ററെ വലിയ രീതിയിലാണ് സോഷ്യൽ മീഡിയ അഭിനന്ദിക്കുന്നത്. അദ്ദേഹം ഉണ്ടാക്കിയ ഈ ചിത്രങ്ങളിൽ എല്ലാം ഒന്നിനൊന്നു ഗംഭീരമാണെന്നും സോഷ്യൽ മീഡിയ പറയുന്നു.
