ഇന്ത്യൻ സിനിമയുടെ നടന വിസ്മയവും മലയാള സിനിമയുടെ താര ചക്രവർത്തിയുമായ മോഹൻലാലിന്റെ വിസ്മയിപ്പിക്കുന്ന അഭിനയ മുഹൂർത്തങ്ങൾ തന്റെ ക്യാമറയിലൂടെ പ്രേക്ഷക സമക്ഷം എത്തിച്ചിട്ടുള്ള ഛായാഗ്രാഹകൻ ആണ് സന്തോഷ് ശിവൻ. ഇരുവറും, കാലാപാനിയും , പവിത്രവും തുടങ്ങി ഒട്ടേറെ മോഹൻലാൽ ക്ലാസിക്കുകൾ നമ്മൾ കണ്ടത് സന്തോഷ് ശിവൻ എന്ന മാസ്റ്റർ സിനിമാട്ടോഗ്രാഫറുടെ ദൃശ്യങ്ങളിലൂടെയാണ്. എന്നാൽ സംവിധായകൻ എന്ന നിലയിൽ മോഹൻലാലുമൊത്തു ഒരു ചിത്രം ചെയ്യാൻ സന്തോഷ് ശിവന് ഇതുവരെ സാധിച്ചിരുന്നില്ല. പ്രേക്ഷകർ ഏറെ ആഗ്രഹിക്കുന്നതുമാണ് ഈ കൂട്ടുകെട്ടിൽ ഒരു ചിത്രം. ഇപ്പോൾ വരുന്ന റിപ്പോർട്ടുകൾ സത്യം ആണെങ്കിൽ മോഹൻലാൽ- സന്തോഷ് ശിവൻ ടീം ഒരു ചിത്രത്തിനായി ഒന്നിക്കാൻ പോവുകയാണ്.
കലിയുഗം എന്ന് പേരിട്ടിരിക്കുന്ന ഈ ചിത്രം നിർമ്മിക്കാൻ പോകുന്നത് ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ ആണ്. ഈ വർഷം ജൂൺ മാസത്തോടെ ഈ ചിത്രത്തിന്റെ ഷൂട്ടിംഗ് ആരംഭിക്കാൻ സാധ്യതയുണ്ടെന്ന തരത്തിലുള്ള വിവരങ്ങൾ ആണ് നമ്മുക്ക് ലഭിച്ചു കൊണ്ടിരിക്കുന്നത്. ചിത്രത്തിന്റെ ഒഫീഷ്യൽ ആയുള്ള അനൗൺസ്‌മെന്റ് വന്നിട്ടില്ല എങ്കിലും ഈ പ്രോജെക്ടിനെ കുറിച്ചുള്ള വാർത്തകൾ സത്യമെന്നു തന്നെയാണ് സിനിമാ പ്രേമികളും ആരാധകരും വിശ്വസിക്കുന്നത്. ഇപ്പോൾ കാളിദാസ് ജയറാം- മഞ്ജു വാര്യർ ടീമിനെ വെച്ച് ജാക്ക് ആൻഡ് ജിൽ എന്ന ഒരു മലയാള ചിത്രം ചെയ്യുകയാണ് സന്തോഷ് ശിവൻ. അതുപോലെ എ ആർ മുരുഗദോസ്- രജനികാന്ത് ചിത്രത്തിന്റെ ക്യാമറാമാനും സന്തോഷ് ശിവൻ ആയിരിക്കും എന്ന് റിപ്പോർട്ടുകൾ ഉണ്ട്. കായംകുളം കൊച്ചുണ്ണിയിലെ അതിഥി വേഷത്തിനു ശേഷം ഗോകുലം ഫിലിംസുമായി മോഹൻലാൽ സഹകരിക്കുന്ന ചിത്രമാകും കലിയുഗം.
