ട്രൈലെർ വന്നത് മുതൽ മലയാള സിനിമാ പ്രേമികൾ പ്രതീക്ഷയോടെ കാത്തിരിക്കുന്ന മാർജാര ഒരു കല്ല് വെച്ച നുണ ഇന്ന് കേരളത്തിലെ തീയേറ്ററുകളിൽ എത്തും. മികച്ച റിലീസ് ആണ് ഈ ചിത്രത്തിന് ഇവിടെ ലഭിച്ചിരിക്കുന്നത്. ഒരു മിസ്റ്ററി ത്രില്ലർ മൂഡിൽ ആണ് ഈ ചിത്രം കഥ പറയുന്നത് എന്ന സൂചനയാണ് ഇതിന്റെ ട്രൈലെർ നമ്മുക്ക് തരുന്നത്. നവാഗത സംവിധായകനായ രാകേഷ് ബാല ഒരുക്കിയ ഈ ചിത്രത്തിൽ ഒരു വലിയ താരനിര തന്നെ അണിനിരക്കുന്നുണ്ട്. മുല്ലപ്പള്ളി പ്രൊഡക്ഷൻസിന്റെ ബാനറിൽ ചാക്കോ മുല്ലപ്പള്ളി നിർമ്മിച്ച ഈ ചിത്രത്തിന്റെ ട്രൈലെർ റിലീസ് ചെയ്തത് കംപ്ലീറ്റ് ആക്ടർ മോഹൻലാൽ ആയിരുന്നു. അതിനു വലിയ പ്രേക്ഷക ശ്രദ്ധയാണ് ലഭിച്ചത്.
ജയ്സൺ ചാക്കോ, വിഹാൻ, രേണു സൗന്ദർ എന്നിവർ പ്രധാന വേഷങ്ങൾ ചെയ്യുന്ന ഈ ചിത്രത്തിൽ അഞ്ജലി നായർ, രാജേഷ് ശർമ്മ, അഭിരാമി, സുധീർ കരമന, ഹരീഷ് പേരടി, ടിനി ടോം, രാജേഷ് പാണാവള്ളി, കൊല്ലം സുധി തുടങ്ങിയ ഒട്ടേറെ പ്രശസ്തരായ താരങ്ങളും അഭിനയിച്ചിട്ടുണ്ട്. ജെറി സെെമൺ ഛായാഗ്രഹണം നിർവഹിച്ച ഈ ചിത്രത്തിന് സംഗീതം ഒരുക്കിയത് കിരൺ ജോസും എഡിറ്റിങ് നിർവഹിച്ചത് പ്രശസ്ത എഡിറ്റർ ആയ ലിജോ പോളും ആണ്. ചിത്രത്തിന്റെ തീയേറ്റർ ലിസ്റ്റ് ഇവിടെ ചേർക്കുന്നു. പ്രേക്ഷകർക്ക് ഒരു പുത്തൻ സിനിമാനുഭവം തന്നെ ഈ ചിത്രം സമ്മാനിക്കും എന്നാണ് അണിയറ പ്രവർത്തകർ പറയുന്നത്. സ്ത്രീ കഥാപാത്രങ്ങൾക്ക് മികച്ച പ്രാധാന്യം ആണ് ഈ ചിത്രത്തിൽ ഉള്ളത് എന്നും റിപ്പോർട്ടുകൾ സൂചിപ്പിക്കുന്നു.
