തമിഴകത്തിന്റെ നടിപ്പിൻ നായകൻ സൂര്യ നായകനായി കഴിഞ്ഞ വർഷം റിലീസ് ചെയ്ത ചിത്രമാണ് ജയ് ഭീം. ആമസോൺ പ്രൈം റിലീസ് ആയെത്തിയ ഈ ചിത്രം വമ്പൻ പ്രേക്ഷക- നിരൂപക പ്രശംസയാണ് നേടിയെടുത്തത്‌. ലോകം മുഴുവനുമുള്ള സിനിമ പ്രേമികൾ ഈ ചിത്രം ചർച്ച ചെയ്ത വിഷയത്തേയും ഇതിലെ അഭിനേതാക്കളുടെ പ്രകടന മികവിനേയും പുകഴ്ത്തി മുന്നോട്ടു വന്നു. കഴിഞ്ഞ വർഷം പുറത്തു വന്ന ഏറ്റവും മികച്ച ചിത്രങ്ങളുടെ മുൻപന്തിയിലാണ് ഇതിനു സ്ഥാനം. സൂര്യയും ഭാര്യ ജ്യോതികയും ചേർന്ന് നിർമ്മിച്ച ഈ ചിത്രം സംവിധാനം ചെയ്തത് ടി ജെ ജ്ഞാനവേൽ ആണ്. ഒരു കോർട്ട് റൂം ഡ്രാമ ആയി ഒരുക്കിയ ഈ ചിത്രത്തിൽ വക്കീൽ ആയ ചന്ദ്രു ആയി സൂര്യ അഭിനയിച്ചപ്പോൾ പ്രധാന കഥാപാത്രമായ സംഗിനി ആയി എത്തിയത് മലയാളി നടിയായ ലിജോമോൾ ജോസ് ആണ്. ഒരു യഥാർത്ഥ സംഭവത്തെ ആസ്പദമാക്കി ഒരുക്കിയ ഈ ചിത്രം തമിഴ്‌നാട്ടിലെ താഴ്ന്ന ജാതിക്കാർ നേരിടുന്ന പ്രശ്നങ്ങളും അടിച്ചമർത്തലുകളും ആണ് അവതരിപ്പിച്ചത്.
ഇപ്പോഴിതാ ഒരു വമ്പൻ അംഗീകാരം ഈ ചിത്രത്തെ തേടിയെത്തിയിരിക്കുകയാണ്. ഓസ്കാർ അക്കാഡമിയുടെ ഒഫീഷ്യൽ യൂട്യൂബ് ചാനലിൽ ഈ ചിത്രത്തിലെ ഒരു രംഗം അവർ അപ്ലോഡ് ചെയ്തിരിക്കുകയാണ്. ഇന്ത്യൻ സിനിമക്കും തമിഴ് സിനിമക്കും ലഭിക്കുന്ന വലിയൊരു അംഗീകാരമാണ് ഇതെന്നാണ് സിനിമാ പ്രേമികൾ അഭിപ്രായപ്പെടുന്നത്. ഒട്ടേറെ അന്താരാഷ്ട്ര ഫിലിം ഫെസ്ടിവലുകളിൽ അടക്കം അംഗീകരിക്കപ്പെട്ട ചിത്രമാണ് ജയ് ഭീം. പ്രശസ്ത മലയാളി നായികയായ രജിഷാ വിജയനും ഈ ചിത്രത്തിലെ പ്രധാന വേഷങ്ങളിൽ ഒന്ന് ചെയ്തിട്ടുണ്ട്. ഏതായാലും ഓസ്കാർ അക്കാദമി കൂടി ജയ് ഭീം എന്ന ചിത്രത്തെ അംഗീകരിച്ചു മുന്നോട്ടു വന്നതോടെ ആഗോള തലത്തിൽ ഈ ചിത്രം നേടുന്ന ശ്രദ്ധ വളരെ വലുതാണ്.
