തമിഴ് യുവതാരം ശിവകാര്‍ത്തികേയന്‍ നായകനാകുന്ന പുതിയ ചിത്രം വെലൈക്കാരന്‍ മലയാളികളും ഏറെ പ്രതീക്ഷയോടെ കാത്തിരിക്കുന്ന സിനിമയാണ്. ഫഹദ് ഫാസില്‍ എന്ന അതുല്യ നടനും വെലൈക്കാരന്‍റെ ഭാഗം ആകുന്നു എന്നതാണ് മലയാളികള്‍ക്ക് ഇടയിലും വെലൈക്കാരന്‍ ശ്രദ്ധാകേന്ദ്രം ആകുന്നത്.
മലയാളത്തിലെ യുവതാരങ്ങളിലെ മികച്ച നടന്‍ എന്ന പേര് നേടിയ ഫഹദിന്‍റെ ആദ്യ തമിഴ് ചിത്രം കൂടിയാണ് വെലൈക്കാരന്‍. വില്ലന്‍ വേഷത്തിലാണ് ചിത്രത്തില്‍ ഫഹദ് ഫാസില്‍ എത്തുന്നത്.
ഫഹദ് ഫാസിലിന് ഒപ്പമുള്ള അഭിനയത്തിലൂടെ ഒട്ടേറെ പാഠങ്ങള്‍ തനിക്ക് പഠിക്കാന്‍ കഴിഞ്ഞു എന്ന്‍ ശിവകാര്‍ത്തികേയന്‍ പറയുന്നു. ഫഹദിന്‍റെ ചിത്രത്തിലെ പ്രകടനം ഏറെ ശ്രദ്ധ നേടുമെന്നാണ് അണിയറ പ്രവര്‍ത്തകര്‍ കരുതുന്നത്.
തനി ഒരുവന്‍ എന്ന ചിത്രത്തിലൂടെ ശ്രദ്ധേയനായ മോഹന്‍ രാജയാണ് വെലൈക്കാരന്‍ സംവിധാനം ചെയ്തിരിക്കുന്നത്. തന്‍റെ കരിയറില്‍ ഏറെ പ്രതീക്ഷയുള്ള ചിത്രമാണ് വെലൈക്കാരന്‍ എന്നാണ് സംവിധായകന്‍ ഇന്‍റര്‍വ്യൂകളില്‍ പറയുന്നത്.
ഈ മാസം 22ന് ചിത്രം വേള്‍ഡ് വൈഡായി റിലീസ് ചെയ്യും. ചിത്രം കേരളത്തില്‍ വിതരണത്തിന് എടുത്തിരിക്കുന്നത് ഈ4 എന്‍റര്‍ടൈന്‍മെന്‍റ് ആണ്.
