ജനപ്രിയ നായകൻ ദിലീപിന്റെ ഏറ്റവും പുതിയ റിലീസായ വോയ്‌സ് ഓഫ് സത്യനാഥൻ കേരളത്തിൽ മികച്ച വിജയം നേടി മുന്നേറുകയാണ്. റിലീസ് ചെയ്ത് അഞ്ച് ദിവസംകൊണ്ട് ഏകദേശം എട്ട് കോടി രൂപയോളമാണ് ഈ ചിത്രം ഗ്രോസ് നേടിയതെന്ന് ആദ്യ കണക്കുകൾ പറയുന്നു. ഈ വർഷം വളരെ ചുരുക്കം ഹിറ്റുകൾ മാത്രമുള്ള മലയാള സിനിമക്ക് ആശ്വാസമായാണ് വോയ്‌സ് ഓഫ് സത്യനാഥൻ എത്തിയിരിക്കുന്നത്. കുറെ നാളുകൾക്ക് ശേഷം സിനിമാ തീയേറ്ററുകൾ നിറഞ്ഞു കവിയുന്ന കാഴ്ചയും ഈ ദിലീപ് ചിത്രം നമ്മുക്ക് കാണിച്ചു തരുന്നുണ്ട്. റാഫി രചിച്ചു സംവിധാനം ചെയ്തിരിക്കുന്ന ഈ ഫാമിലി കോമഡി എന്റെർറ്റൈനെർ നാളെ മുതൽ ഗൾഫ് രാജ്യങ്ങളിലും റിലീസ് ചെയ്യുകയാണ്.
ഗൾഫിലെ തൊണ്ണൂറോളം കേന്ദ്രങ്ങളിലാണ് വോയ്‌സ് ഓഫ് സത്യനാഥൻ എത്തുന്നത്. ഹോം സ്ക്രീൻ എന്റർടൈൻമെന്റ് ഗൾഫിൽ എത്തിക്കുന്ന ഈ ചിത്രം, കേരളത്തിൽ നേടിയ വലിയ വിജയം അവിടേയും ആവർത്തിക്കുമെന്ന പ്രതീക്ഷയിലാണ് ആരാധകർ. ബാദുഷ സിനിമാസ്, ഗ്രാൻഡ് പ്രൊഡക്ഷൻസ്, പെൻ ആൻഡ് പേപ്പർ ക്രിയേഷൻസ് എന്നിവയുടെ ബാനറിൽ ബാദുഷ, ദിലീപ്, ഷിനോയ് മാത്യു, രാജൻ ചിറയിൽ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിൽ ദിലീപിനൊപ്പം ജോജു ജോർജ്, സിദ്ദിഖ്, ജോണി ആന്റണി, വീണ നന്ദകുമാർ, രമേശ് പിഷാരടി, ജഗപതി ബാബു എന്നിവരും പ്രധാന വേഷങ്ങൾ ചെയ്തിരിക്കുന്നു. അങ്കിത് മേനോൻ സംഗീതമൊരുക്കിയ വോയ്‌സ് ഓഫ് സത്യനാഥൻ എഡിറ്റ് ചെയ്തിരിക്കുന്നത് ഷമീർ മുഹമ്മദാണ്
