ബിജു മേനോൻ നായകനായി എത്തുന്ന പുതിയ ചിത്രമാണ് നവാഗതനായ റഫീഖ് ഇബ്രാഹിം സംവിധാനം ചെയ്ത പടയോട്ടം. മോഹൻലാൽ നായകനായ മുന്തിരി വള്ളികൾ തളിർക്കുമ്പോൾ എന്ന ബ്ലോക്ക്ബസ്റ്റർ ചിത്രത്തിന് ശേഷം വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ ആണ് ഈ ചിത്രം നിർമ്മിച്ചിരിക്കുന്നത്. മലയാള സിനിമയിലെ ഹാസ്യ സാമ്രാട്ട് ആയ ജഗതി ശ്രീകുമാറിന് ട്രിബ്യുട്ടുമായി ഇന്ന് പടയോട്ടത്തിൽ പിംഗ് പോംഗ് പ്രോമോ സോങ് റിലീസ് ചെയ്യുകയും ആ ഗാനം സോഷ്യൽ മീഡിയ ഒന്നടങ്കം ഏറ്റെടുക്കുന്ന കാഴ്ചയുമാണ് നമ്മൾ കാണുന്നത്. സൂപ്പർ ഹിറ്റായ മോഹൻലാൽ- പ്രിയദർശൻ ചിത്രമായ അരം + അരം =കിന്നരം എന്ന ചിത്രത്തിലെ ജഗതി ചേട്ടന്റെ കഥാപാത്രം പറയുന്ന സൂപ്പർ ഹിറ്റ് ഡയലോഗ് വെച്ചാണ് ഈ അടിപൊളി പ്രോമോ സോങ് ഒരുക്കിയിരിക്കുന്നത്. റിലീസ് ചെയ്തു മിനിട്ടുകൾക്കകം തന്നെ പ്രേക്ഷകർ നെഞ്ചോട് ചേർത്ത ഈ ഗാനം മലയാളത്തിലെ പുതിയ ട്രെൻഡ് സെറ്റെർ സോങ് ആയി മാറുമെന്നാണ് പ്രതീക്ഷിക്കപ്പെടുന്നത്.
സോനു സുരേന്ദ്രൻ, വിനോദ്, അരുൺ എ ആർ എന്നിവർ ചേർന്ന് പാടിയിരിക്കുന്ന ഈ ഗാനത്തിന് സംഗീതം ഒരുക്കിയിരിക്കുന്നത് പവി ശങ്കർ, സോനു സുരേന്ദ്രൻ എന്നിവർ ചേർന്നാണ്. ഇവർ രണ്ടു പേരും ചെന്ന് തന്നെയാണ് ഈ ഗാനത്തിന് വരികൾ രചിച്ചിരിക്കുന്നതും. ആക്ഷനും കോമെടിയും ത്രില്ലും ഇടകലർന്ന ഒരു കമ്പ്ലീറ്റ് എന്റെർറ്റൈനെർ ആയാണ് ഈ ചിത്രം ഒരുക്കിയിരിക്കുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്.
ബിജു മേനോനെ കൂടാതെ സൈജു കുറുപ്പ്, ദിലീഷ് പോത്തൻ, ലിജോ ജോസ് പെല്ലിശ്ശേരി, സുരേഷ് കൃഷ്ണ, അനു സിതാര, ഹാരിഷ് കണാരൻ, രവി സിംഗ് എന്നിവരാണ് ഈ ചിത്രത്തിലെ മറ്റു കഥാപാത്രങ്ങൾക്ക് ജീവൻ നൽകിയിരിക്കുന്നത്. ബിജു മേനോൻ ചെങ്കൽ രഘു എന്ന ഗുണ്ടയുടെ വേഷത്തിലെത്തുന്ന ഈ ചിത്രം രചിച്ചിരിക്കുന്നത് അരുൺ എ ആർ, അജയ് രാഹുൽ എന്നിവർ ചേർന്നാണ്.
