മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ നിർമ്മിക്കുന്ന പുതിയ ചിത്രത്തിൽ നായകനായി ബിജു മേനോൻ. നവാഗതനായ തമ്പി (അമൽ ഷീല തമ്പി) സംവിധാനം ചെയ്യുന്ന ചിത്രത്തിൽ ഗ്രേസ് ആന്റണിയാണ് നായികാ വേഷം ചെയ്യുക. യുവതാരം ശ്രീനാഥ് ഭാസിയും ചിത്രത്തിൽ പ്രധാന വേഷമാണ് ചെയ്യുന്നത്.
വിനയ് ഫോർട്ട്, ഗണപതി, പോളി വത്സൻ തുടങ്ങിയവരാണ് ചിത്രത്തിലെ മറ്റു പ്രധാന കഥാപാത്രങ്ങൾക്ക് ജീവൻ നൽകുക. ഹാപ്പി വെഡിങ്, തമാശ, പ്രതി പൂവൻകോഴി, കനകം കാമിനി കലഹം, ചട്ടമ്പി, റോഷാക്ക്, അപ്പൻ തുടങ്ങിയ ചിത്രങ്ങളിലെ മികച്ച പ്രകടനങ്ങളിലൂടെ ശ്രദ്ധ നേടിയ ഗ്രേസ് ആന്റണി ആദ്യമായാണ് ബിജു മേനോൻ ചിത്രത്തിൽ നായികാ വേഷം ചെയ്യുന്നത്.
ജീത്തു ജോസഫ്- ബേസിൽ ജോസഫ് ടീമിന്റെ നുണക്കുഴി ആയിരുന്നു ഗ്രേസ് ആന്റണിയുടെ അവസാന റിലീസ്. അതിലെ പ്രകടനത്തിന് ഗ്രേസ് ഏറെ കയ്യടി നേടിയിരുന്നു. സുരാജ് വെഞ്ഞാറമ്മൂട് നായകനായ നാഗേന്ദ്രൻസ് ഹണിമൂൺസ് വെബ് സീരീസിൽ ലില്ലിക്കുട്ടി എന്ന കഥാപാത്രമായും ഗ്രേസ് ആന്റണി വലിയ ശ്രദ്ധ നേടി.
ഇപ്പോൾ കുഞ്ചാക്കോ ബോബൻ- രതീഷ് ബാലകൃഷ്ണൻ പൊതുവാൾ ടീമിന്റെ ‘ ഒരു ദുരൂഹ സാഹചര്യത്തിൽ’ എന്ന ചിത്രം നിർമിക്കുന്ന മാജിക് ഫ്രെയിംസ്. ഗരുഡന് ശേഷം അരുൺ വർമ്മ ഒരുക്കാൻ പോകുന്ന ചിത്രവും നിർമ്മിക്കും. കുഞ്ചാക്കോ ബോബൻ തന്നെയാണ് ഇതിലും നായകനായി എത്തുന്നത്. പൃഥ്വിരാജ് പ്രൊഡക്ഷൻസിനൊപ്പം ചേർന്ന് വിപിൻ ദാസ് ഒരുക്കുന്ന സന്തോഷ് ട്രോഫി എന്ന ചിത്രവും മാജിക് ഫ്രെയിംസ് നിർമ്മിക്കുമെന്ന് പ്രഖ്യാപിച്ചിട്ടുണ്ട്.
