മലയാളത്തിന്റെ മഹാനടൻ കംപ്ലീറ്റ് ആക്ടർ മോഹൻലാലിനെ നായകനാക്കി ലിജോ ജോസ് പെല്ലിശ്ശേരി ഒരു ചിത്രം സംവിധാനം ചെയ്യാൻ പോകുന്നു എന്ന വാർത്തകൾ ഇപ്പോൾ സോഷ്യൽ മീഡിയയിൽ വലിയ രീതിയിൽ പ്രചരിക്കുന്നുണ്ട്. ഈ പ്രൊജക്റ്റ് ഏകദേശം ഉറപ്പായി എന്നും ഈ വർഷം അവസാനമോ അടുത്ത വർഷം ആദ്യമോ ഈ പ്രൊജക്റ്റ് ആരംഭിക്കുമെന്നാണ് സൂചനയൊന്നും റിപ്പോർട്ടുകൾ പറയുന്നു. ഗാട്ടാ ഗുസ്തിയുടെ പശ്‌ചാത്തലത്തിൽ ആന്ധ്രയിൽ നടക്കുന്ന കഥയാണ് ഈ ചിത്രത്തിലൂടെ പറയുകയെന്നും വാർത്തകൾ വന്നിരുന്നു. ഇപ്പോഴിതാ ഈ ചിത്രത്തിന്റെ താരനിരയെ കുറിച്ചും ഇതിൽ ജോലി ചെയ്യാൻ പോകുന്ന സാങ്കേതിക പ്രവർത്തകരെ കുറിച്ചും വാർത്തകൾ വരികയാണ്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കാൻ പോകുന്ന ഈ ചിത്രത്തിൽ മോഹൻലാലിനൊപ്പം ആന്റണി വർഗീസ്, ജോജു ജോർജ്, ചെമ്പൻ വിനോദ് എന്നിവരും വേഷമിടുമെന്നാണ് സൂചന.
ഗിരീഷ് ഗംഗാധരൻ ക്യാമറ ചലിപ്പിക്കാൻ പോകുന്ന ഈ ചിത്രത്തിന് സംഗീതമൊരുക്കുന്നത് പ്രശാന്ത് പിള്ളൈ, കലാസംവിധാനം നിർവഹിക്കുന്നത് ദിലീപ് നാഥ് എന്നിവരാണെന്നും വാർത്തകൾ പറയുന്നു. ആമേൻ എന്ന സൂപ്പർ ഹിറ്റ് ലിജോ ജോസ് പെല്ലിശ്ശേരി ചിത്രം രചിച്ച പി എസ് റഫീഖ് ആയിരിക്കും ഈ ചിത്രം രചിക്കുകയെന്നും ലിജോ ജോസ് പെല്ലിശ്ശേരി ഇതിന്റെ രചന പങ്കാളി കൂടിയായിരിക്കുമെന്നുമാണ് റിപ്പോർട്ടുകൾ വരുന്നത്. അധികം വൈകാതെ തന്നെ ഈ ചിത്രത്തിന്റെ ഔദ്യോഗിക പ്രഖ്യാപനം ഉണ്ടാവുമെന്നും സൂചനയുണ്ട്. ജീത്തു ജോസഫ് സംവിധാനം ചെയ്യുന്ന റാം എന്ന ചിത്രമാണ് ഇപ്പോൾ മോഹൻലാൽ ചെയ്യുന്നത്. നവംബർ അവസാനമോ ഡിസംബർ ആദ്യമോ ആയിരിക്കും റാം പൂർത്തിയാവുക.
