ആരാധകരുടെ ഏറെ നാളത്തെ കാത്തിരിപ്പിന് വിരാമമിട്ടുകൊണ്ട് നസ്രിയ നസിം തിരിചച്ചുവരവ് നടത്തുന്ന അഞ്ജലി മേനോൻ ചിത്രത്തിന്റെ ഷൂട്ടിങ് ആരംഭിച്ചു. ഊട്ടിയിൽ നിന്നുള്ള സിനിമയിലെ ചില ലൊക്കേഷൻ ദൃശ്യങ്ങൾ ഇപ്പോൾ പുറത്തുവന്നിരിക്കുകയാണ്.
നസ്രിയയെയും പൃഥിരാജിനെയും ചിത്രങ്ങളിൽ കാണാം. പാർവതിയാണ് ഇനിയും പേരിടാത്ത ചിത്രത്തിലെ മറ്റൊരു നായിക. അതുൽ കുൽക്കർണി, റോഷൻ മാത്യു, സിദ്ധാർത്ഥ് മേനോൻ, മാലാ പാർവതി, വിജയരാഘവൻ, സംവിധായകൻ രഞ്ജിത്ത് എന്നിവരും മറ്റ് പ്രധാന വേഷങ്ങളിലെത്തുന്നു.
2012ൽ പുറത്തിറങ്ങിയ മഞ്ചാടിക്കുരുവിന് ശേഷം അഞ്ജലി മേനോനും പൃഥ്വിരാജും വീണ്ടും ഒന്നിക്കുന്ന ചിത്രമാണിത്. വിവാഹത്തിന് മുൻപ് നസ്രിയ അവസാനമായി അഭിനയിച്ചത് അഞ്ജലി മേനോൻ ചിത്രമായ ബാംഗ്ലൂർ ഡേയ്‌സിലായിരുന്നു. തിരിച്ചുവരവും അതെ സംവിധായികയുടെ തന്നെ ചിത്രത്തിലൂടെയാണെന്ന പ്രത്യേകതയും ഇതിനുണ്ട്.
പറവയുടെ ഛായാഗ്രാഹകൻ ലിറ്റില്‍ സ്വായമ്പാണ് ഈ ചിത്രത്തിന്റെയും ഛായാഗ്രഹണം നിർവഹിക്കുന്നത്. സംഗീതം എം. ജയചന്ദ്രനാണ്. ബോളിവുഡില്‍ നിന്നുള്ള രഘു ദീക്ഷിതും പാട്ടൊരുക്കുന്നുണ്ട്. ടു കണ്ട്രീസിനു ശേഷം രജപുത്ര ഇന്റര്‍ നാഷണലിന്റെ ബാനറില്‍ എം. രഞ്ജിത്താണ് ചിത്രം നിർമ്മിക്കുന്നത്. 2018ലെ വേനലവധിക്ക് ചിത്രം തീയറ്ററുകളിലേക്കെത്തും.
