അല്ലു അർജുൻ നായകനായി എത്തുന്ന പുതിയ തെലുങ്കു ചിത്രത്തിൽ മലയാളത്തിന്റെ പ്രീയപ്പെട്ട താരം ജയറാമും ഒരു നിർണ്ണായക വേഷം ചെയ്യുന്നുണ്ട്. അങ്ങ് വൈകുണ്ഠപുരത്തു എന്ന പേരിൽ മലയാളത്തിലും ഡബ്ബ് ചെയ്തു എത്തുന്ന ഈ ചിത്രത്തിന്റെ ടീസർ നാളെ റിലീസ് ചെയ്യും. ഈ ചിത്രത്തിലെ ഇതുവരെ പുറത്തു വന്ന ലിറിക് സോങ് വീഡിയോസ് എല്ലാം തന്നെ വമ്പൻ ഹിറ്റാണ്. അല്ലു അർജുന്റെ അച്ഛൻ ആയി ജയറാം അഭിനയിക്കുന്ന ഈ ചിത്രത്തിൽ പ്രശസ്ത നടി തബുവും അഭിനയിക്കുന്നു. അടുത്ത മാസം ആണ് ഈ ചിത്രം റിലീസിന് തയ്യാറെടുക്കുന്നത്. ഈ ചിത്രത്തിലെ കഥാപാത്രത്തിന് വേണ്ടി ജയറാം നടത്തിയ ഞെട്ടിക്കുന്ന ഫിസിക്കൽ മേക് ഓവർ സോഷ്യൽ മീഡിയയിൽ വൈറൽ ആയിരുന്നു.
അല വൈകുന്തപുറംലോ എന്ന പേരിൽ തെലുങ്കിൽ റിലീസ് ചെയ്യാൻ പോകുന്ന ഈ ചിത്രത്തിൽ പൂജ ഹെഗ്‌ഡെ, നിവേദ പെതുരാജ് എന്നിവർ ആണ് നായികമാർ ആയി എത്തുക. പ്രശസ്ത സംവിധായകനായ ത്രിവിക്രം ശ്രീനിവാസ് രചനയും സംവിധാനവും നിർവഹിച്ച ഈ ചിത്രത്തിന്റെ ഇതുവരെ പുറത്തു വന്ന പോസ്റ്ററുകൾ ഇതിലെ സ്റ്റില്ലുകൾ എന്നിവയും സോഷ്യൽ മീഡിയയിൽ വലിയ ഹിറ്റാണ്. നവദീപ്, സുശാന്ത്, സത്യരാജ് , സമുദ്രക്കനി, സുനിൽ, രാജേന്ദ്ര പ്രസാദ്, ബ്രഹ്മാജി, ഹർഷ വർധന, സച്ചിൻ കടേക്കർ, നാസ്സർ, വെണ്ണല കിഷോർ എന്നിവരും അഭിനയിച്ച ഈ ചിത്രത്തിന് സംഗീതം ഒരുക്കിയത് എസ് തമൻ ആണ്. ഗീത ആർട്സ്, ഹാരിക ആൻഡ് ഹസ്സിന് ക്രീയേഷൻസ് എന്നിവയുടെ ബാനറിൽ അല്ലു അരവിന്ദ്, എസ് രാധാകൃഷ്ണ എന്നിവർ ചേർന്ന് നിർമ്മിച്ച ഈ ചിത്രത്തിന് വേണ്ടി കാമറ ചലിപ്പിച്ചത് പി എസ് വിനോദ് ആണ്.
