മലയാളത്തിന്റെ പാൻ ഇന്ത്യൻ സൂപ്പർസ്റ്റാർ ദുൽഖർ സൽമാൻ നായകനായ കിംഗ് ഓഫ് കൊത്ത ഇന്നലെയാണ് ആഗോള റിലീസായി എത്തിയത്. കേരളത്തിലെ അഞ്ഞൂറോളം സ്‌ക്രീനുകളിലായി രണ്ടായിരത്തോളം ഷോകളാണ് ഈ ചിത്രം ആദ്യം ദിനം കളിച്ചതെന്നാണ് സൂചന. ആരാധകർ വലിയ വരവേൽപ്പ് നൽകിയ ഈ ചിത്രത്തിന്, പ്രേക്ഷകരെ ആവേശം കൊള്ളിക്കുന്ന ഒരു മാസ്സ് എന്റെർറ്റൈനെർ എന്ന അഭിപ്രായം നേടിയെടുക്കാൻ സാധിച്ചിട്ടുണ്ട്. ആദ്യാവസാനം ത്രസിപ്പിക്കുന്ന മാസ്സ് പെർഫോമൻസ് കാഴ്ചവെച്ച ദുൽഖർ തന്നെയാണ് ചിത്രത്തിന്റെ ഹൈലൈറ്റ്. ഇപ്പോഴിതാ ഈ ചിത്രത്തിന്റെ ആദ്യ ദിന കേരളാ കളക്ഷൻ റിപ്പോർട്ട് എത്തിയിരിക്കുകയാണ്. ട്രേഡ് അനലിസ്റ്റുകളുടെ വിശകലന പ്രകാരം ഈ ചിത്രം ആദ്യ ദിനം ഇവിടെ നിന്ന് നേടിയത് ആറ് കോടി രൂപക്ക് മുകളിലാണ്. ആറിനും ആറര കോടിക്കുമിടയിൽ ആദ്യ ദിന ഗ്രോസ് നേടിയ ഈ ചിത്രം കേരളത്തിൽ ഒരു ദുൽഖർ ചിത്രം നേടുന്ന ഏറ്റവും ഉയർന്ന ഓപ്പണിങ് ഡേ ഗ്രോസ് എന്ന നേട്ടവും കൈവരിച്ചു.
ആദ്യമായാണ് ഒരു ദുൽഖർ സൽമാൻ ചിത്രം കേരളത്തിൽ നിന്ന് 6 കോടി രൂപയ്ക്കു മുകളിൽ ആദ്യ ദിന ഗ്രോസ് നേടുന്നത്. 7 കോടിക്ക് മുകളിൽ ആദ്യ ദിന ഗ്രോസ് നേടിയിട്ടുള്ള കെ ജി എഫ് 2 , ഒടിയൻ എന്നിവയും 6 കോടിക്ക് മുകളിൽ ഗ്രോസ് നേടിയിട്ടുള്ള മരക്കാർ, ബീസ്റ്റ്, ലൂസിഫർ, ഭീഷ്മ പർവ്വം എന്നിവയുമാണ് ഇതിന്‌ മുൻപ് ഇത്രയും വലിയ ഓപ്പണിങ് കേരളത്തിൽ നേടിയ ചിത്രങ്ങൾ. മോഹൻലാൽ, വിജയ്, യാഷ്, മമ്മൂട്ടി എന്നിവർ തിളങ്ങി നിൽക്കുന്ന ഈ വമ്പൻ ലിസ്റ്റിൽ സ്വന്തം പേര് കൂടി ചേർക്കാൻ കിംഗ് ഓഫ് കൊത്തയിലൂടെ ദുൽഖർ സൽമാന് സാധിച്ചു എന്നത് വലിയ നേട്ടമാണ്. മലയാളത്തിലെ യുവതാരങ്ങളിൽ ഏറ്റവും വലിയ ക്രൗഡ് പുള്ളർ താൻ തന്നെയാണെന്ന് ഒരിക്കൽ കൂടി തെളിയിക്കുകയാണ് ദുൽഖർ. നേരത്തെ 5 കോടിക്ക് മുകളിൽ ആദ്യ ദിന ഗ്രോസ് നേടിയ കുറുപ്പ് ആയിരുന്നു ദുൽഖറിന്റെ ഏറ്റവും വലിയ ആദ്യ ദിന കേരളാ ഗ്രോസ് നേടിയ ചിത്രം.
