തമിഴകത്തിന്റെ തല അജിത് കുമാർ നായകനായി എത്തുന്ന പുതിയ ചിത്രമാണ് വാലിമൈ. തീരൻ അധികാരം ഒൻഡ്രു, നേർക്കൊണ്ട പാർവൈ എന്നീ വമ്പൻ ഹിറ്റായ ചിത്രങ്ങൾക്ക് ശേഷം എച്ച് വിനോദ് ഒരുക്കിയ ഈ ചിത്രം പ്രശസ്ത ബോളിവുഡ് സിനിമാ നിർമ്മാതാവായ ബോണി കപൂർ ആണ് നിർമ്മിക്കുന്നത്. ഇന്ത്യൻ സിനിമയിൽ തന്നെ ഇപ്പോൾ ഏറ്റവും കൂടുതൽ ഹൈപ്പ് ഉള്ള ചിത്രങ്ങളിൽ ഒന്നായി ഈ ചിത്രം മാറിക്കഴിഞ്ഞു. ഇതിന്റെ മോഷൻ പോസ്റ്റർ കുറച്ചു നാൾ മുൻപ് പുറത്തു വരികയും വമ്പൻ തരംഗം സൃഷ്ടിക്കുകയും ചെയ്തിരുന്നു. ഇപ്പോഴിതാ ഈ ചിത്രത്തിന്റെ മറ്റൊരു വീഡിയോ കൂടി അണിയറപ്രവർത്തകർ പുറത്തു വിട്ടിരിക്കുകയാണ്. തല അജിത്തിന്റെ സാഹസികമായ സംഘട്ടന രംഗങ്ങൾ ആണ് ഇപ്പോൾ പുറത്തു വന്ന വീഡിയോയുടെ ഏറ്റവും വലിയ ഹൈലൈറ്റ്. അജിത്തിന്റെ കിടിലൻ ഡയലോഗുകൾ, മാസ്സ് രംഗങ്ങൾ എന്നിവയും ആരാധകരെ ത്രസിപ്പിക്കുന്നുണ്ട്.
ഈ ചിത്രത്തിൽ അജിത്തിന് പുറമേ ഹുമ ഖുറേഷി, യോഗി ബാബു, കാർത്തികേയ എന്നിവരും അഭിനയിക്കുന്നുണ്ട്. യുവാൻ ശങ്കർ രാജ സംഗീതമൊരുക്കിയ ഈ ചിത്രത്തിന്റെ മോഷൻ പോസ്റ്ററിന് വേണ്ടി അദ്ദേഹമൊരുക്കിയ പശ്ചാത്തല സംഗീതവും സൂപ്പർ ഹിറ്റായി മാറിയിരുന്നു. ഈ ചിത്രത്തിന് ഒരു രണ്ടാം ഭാഗം ഉണ്ടാകുമെന്ന് പറയുന്ന റിപ്പോർട്ടുകളും നേരത്തെ പുറത്തു വന്നിരുന്നു. അടുത്ത വർഷം പൊങ്കൽ റിലീസ് ആയാണ് ഈ ചിത്രം ഇപ്പോൾ പ്ലാൻ ചെയ്തിരിക്കുന്നത്. ഈ ചിത്രത്തിന് ശേഷം തല അജിത് സിനിമയിൽ നിന്ന് ഒരു ഇടവേള എടുത്തു ബൈക്കിൽ ലോക സഞ്ചാരത്തിന് പോകുകയാണ് എന്നും വാർത്തകൾ വരുന്നുണ്ട്. ഏതായാലും ഈ ചിത്രം കാത്തിരിക്കുന്ന തല ആരാധകരെയും സിനിമാ പ്രേമികളെയും ആവേശം കൊള്ളിക്കുന്ന വീഡിയോ ആണ് ഇപ്പോൾ പുറത്തു വന്നിരിക്കുന്നത്.
