ഏതാനും ദിവസങ്ങൾക്കു മുൻപാണ് മലയാളി സിനിമാ പ്രേക്ഷകർ ഏറെ കാത്തിരിക്കുന്ന ഒടിയൻ എന്ന ബ്രഹ്മാണ്ഡ മോഹൻലാൽ ചിത്രത്തിലെ ആദ്യ ഗാനം റിലീസ് ചെയ്തത്. ഈ ചിത്രത്തിലെ ആദ്യ ഗാനത്തിന്റെ ലിറിക് വീഡിയോ ആണ് ഒടിയൻ ടീം റിലീസ് ചെയ്തത്. യൂട്യൂബിൽ റിലീസ് ചെയ്ത ഈ വീഡിയോ ഇപ്പോഴും യൂട്യൂബിൽ ട്രെൻഡിങ് ആണെന്ന് മാത്രമല്ല 2 മില്ല്യൺ യൂട്യൂബ് വ്യൂസ് നേടി ചരിത്രം രചിച്ചു കൊണ്ട് മുന്നേറുകയാണ്. ആദ്യമായാണ് മലയാള സിനിമയിലെ ഒരു പാട്ടിന്റെ ലിറിക് വീഡിയോ ഇത്രയധികം കാഴ്ചക്കാരെ യൂട്യൂബിൽ നിന്ന് നേടുന്നത്. ഈ സന്തോഷം പങ്ക് വെച്ചു കൊണ്ട് പ്രശസ്ത ഗായിക ശ്രേയ ഘോഷാൽ ഈ ഗാനം സോഷ്യൽ മീഡിയയിലൂടെ ആലപിച്ചു കൊണ്ട് ഇപ്പോൾ രംഗത്തു വന്നു കഴിഞ്ഞു.
ഇത്ര മനോഹരമായ ഒരു ഗാനം തനിക്ക് നൽകിയ എം ജയചന്ദ്രന് നന്ദി പറഞ്ഞ ശ്രേയ ഈ പാട്ടിന്റെ ദൃശ്യങ്ങൾ കാണാനും അതുപോലെ ഒടിയൻ എന്ന ചിത്രം കാണാനും കാത്തിരിക്കുകയാണ് എന്നും പറഞ്ഞു. എം ജയചന്ദ്രൻ ഈണം നൽകിയ കൊണ്ടോരാം കൊണ്ടോരാം കൈതോല പായ കൊണ്ടോരാം എന്ന ഈ മനോഹരമായ മെലഡിയാണ് ഇപ്പോൾ സോഷ്യൽ മീഡിയയിൽ മുഴുവൻ നിറഞ്ഞു നിൽക്കുന്നത്. റഫീഖ് അഹമ്മദ് വരികൾ എഴുതിയ ഈ ഗാനം ആലപിച്ചിരിക്കുന്നത് സുദീപും ശ്രേയ ഘോഷാലും ചേർന്നാണ്. ചിത്രത്തിലെ നായകനായ മോഹൻലാലിന്റെ മനോഹരമായ വോയിസ് കവറോടു കൂടിയാണ് ഈ ലിറിക് വീഡിയോ റിലീസ് ചെയ്തത്. എം ജി ശ്രീകുമാർ, ശങ്കർ മഹാദേവൻ, മോഹൻലാൽ എന്നിവരും പാടിയ പാട്ടുകൾ ഈ ചിത്രത്തിൽ ഉണ്ട്. ഏതായാലും മലയാളത്തിലെ ഈ വർഷത്തെ ഏറ്റവും ഹിറ്റായ ഗാനമായി ഒടിയനിലെ ഈ ഗാനം മാറിയിരിക്കുകയാണ്.
