തമിഴകത്തിന്റെ ചിയാൻ വിക്രം, അദ്ദേഹത്തിന്റെ മകൻ ധ്രുവ് വിക്രം എന്നിവർ പ്രധാന വേഷങ്ങൾ ചെയ്യുന്ന പുതിയ തമിഴ് ചിത്രമാണ് മഹാൻ. കാർത്തിക് സുബ്ബരാജ് സംവിധാനം ചെയ്ത ഈ ചിത്രത്തിന്റെ പുതിയ കാരക്ടർ ടീസർ ഇപ്പോൾ പുറത്തു വന്നിരിക്കുകയാണ്. വലിയ പ്രേക്ഷക ശ്രദ്ധയാണ് ഈ ടീസർ നേടിയെടുത്തിരിക്കുന്നതു. ധ്രുവ് വിക്രം അവതരിപ്പിക്കുന്ന കഥാപാത്രത്തെ പരിചയപ്പെടുത്തികൊണ്ടുള്ള ടീസറാണ് ഇപ്പോൾ വന്നിരിക്കുന്നത്. ധ്രുവ് വിക്രത്തിന്റെ ക്യാരക്ടർ ലുക്ക് ആണ് ഇതിലൂടെ പുറത്തു വിട്ടിരിക്കുന്നത്. ഡാഡ എന്നാണ് ഇതിൽ ധ്രുവ് വിക്രം അവതരിപ്പിക്കുന്ന കഥാപാത്രത്തിന്റെ പേര്. സിമ്രൻ, ബോബി സിംഹ, വാണി ഭോജൻ, സനന്ത് എന്നിവരും അഭിനയിക്കുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ വമ്പൻ ഹിറ്റായി മാറിയിരുന്നു. മകൻ ധ്രുവിനൊപ്പം ആദ്യമായി ഒന്നിച്ചഭിനയിച്ച ഈ ചിത്രം വിക്രത്തിന്റെ കരിയറിലെ അറുപതാമത്തെ സിനിമയാണ് എന്നതും ശ്രദ്ധേയമാണ്.
സന്തോഷ് നാരായാണൻ സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന്റെ ആദ്യ കാരക്ടർ ടീസറായി വിക്രമിന്റെ കഥാപാത്രത്തെയാണ് പരിചയപ്പെടുത്തിയത്. മുടി നീട്ടി വളർത്തിയ ലുക്കിലാണ് വിക്രം ഈ ചിത്രത്തിൽ പ്രത്യക്ഷപ്പെടുന്നത്. എസ് എസ് ലളിത് കുമാർ ആണ് ഈ ചിത്രം നിർമ്മിച്ചിരിക്കുന്നത്. ധനുഷ് നായകനായ ജഗമേ തന്തിരത്തിനു ശേഷം റിലീസ് ആവാൻ പോകുന്ന കാർത്തിക് സുബ്ബരാജ് ചിത്രമാണ് ഇത്. ഒറ്റിറ്റി റിലീസ് ആയി നെറ്റ്ഫ്ലിക്സിലൂടെ എത്തിയ ജഗമേ തന്തിരം അത്ര മികച്ച പ്രേക്ഷക പ്രതികരണമല്ല നേടിയെടുത്തത്. അതുകൊണ്ട് തന്നെ മഹാൻ എന്ന ഈ ചിത്രം കാർത്തിക് സുബ്ബരാജിനെ സംബന്ധിച്ച് നിർണ്ണായകമാണ്. മഹാൻ കൂടാതെ, കോബ്ര, ധ്രുവ നചത്രം, പൊന്നിയിൻ സെൽവൻ എന്നിവയാണ് വിക്രം അഭിനയിച്ചു ഇനി പുറത്തു വരാനുള്ള ചിത്രങ്ങൾ.
