പ്രേക്ഷകർ ഏറെ കാത്തിരിക്കുന്ന ആന അലറലോടലറൽ എന്ന ചിത്രത്തിന്റെ ട്രൈലെർ ഇന്ന് റിലീസ് ചെയ്തു. വളരെ രസകരമായ ഈ ട്രെയിലറിന് മികച്ച പ്രേക്ഷക പ്രതികരണം ആണ് തുടക്കം മുതലേ ലഭിക്കുന്നത്. പേര് കൊണ്ട് തന്നെ കൗതുകമുണർത്തിയ ഈ ചിത്രം സംവിധാനം ചെയ്തത് നവാഗത സംവിധായകൻ ആയ ദിലീപ് മേനോൻ ആണ്. ശരത് ബാലൻ തിരക്കഥ രചിച്ച ഈ ചിത്രം നിർമ്മിച്ചിരിക്കുന്നത് പോയട്രി ഫിലിമ്സിന്റെ ബാനറിൽ സിബി തോട്ടുപുറം, നേവിസ് സേവ്യർ എന്നിവർ ചേർന്നാണ്. വിനീത് ശ്രീനിവാസൻ നായകൻ ആയി എത്തുന്ന ഈ കോമഡി എന്റെർറ്റൈനെറിൽ നായികാ വേഷത്തിൽ എത്തിയിരിക്കുന്നത് പ്രശസ്ത നടി അനു സിതാര ആണ്. പേര് പോലെ തന്നെ ഒരു ആനയും ഈ ചിത്രത്തിന്റെ കഥാ ഗതിയിൽ നിർണ്ണായക പങ്കു വഹിക്കുന്നുണ്ട് എന്നാണ് സൂചന.
ഒരു ഗ്രാമത്തിൽ നടക്കുന്ന കഥയാണ് ഈ ചിത്രം ആക്ഷേപ ഹാസ്യം കലർത്തി പറയുന്നത്. ഷാൻ റഹ്മാൻ സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയത് ദീപു എസ് ഉണ്ണിയും എഡിറ്റ് ചെയ്തിരിക്കുന്നത് മനോജുമാണ്. വിജയരാഘവന്‍, സുരാജ് വെഞ്ഞാറമൂട്, മാമൂക്കോയ, ഹാരിഷ് കണാരന്‍, വിശാഖ് നായര്‍ , ഇന്നസെന്റ്, ധർമജൻ ബോൾഗാട്ടി, തെസ്നി ഖാൻ എന്നിവരും ഈ ചിത്രത്തിൽ അഭിനയിക്കുന്നുണ്ട്.
വിനീത് ശ്രീനിവാസൻ നായകൻ ആയി എത്തുന്ന ഈ വർഷത്തെ മൂന്നാമത്തെ ചിത്രമാണ് ഇത്. ആദ്യ വായനയിൽ തന്നെ ഇഷ്ടപെട്ട ഒരു തിരക്കഥയാണ് ഈ ചിത്രത്തിന്റേത് എന്ന് വിനീത് ശ്രീനിവാസൻ തന്റെ ഫേസ്ബുക് പേജിലെ ഒരു കുറിപ്പിലൂടെ ചിത്രം ആരംഭിച്ച സമയത്തു തന്നെ പറഞ്ഞിരുന്നു. ഈ വരുന്ന ഡിസംബർ 22 നു ചിത്രം കേരളത്തിലെ പ്രദർശന ശാലകളിൽ എത്തും.
