തമിഴിലെ സൂപ്പർ താരങ്ങളിൽ ഒരാളായ വിശാൽ നായകനാവുന്ന പുതിയ ചിത്രമാണ് ലാത്തി. ഇപ്പോൾ ഈ ചിത്രത്തിന്റെ ടൈറ്റിൽ പോസ്റ്റർ എത്തിയിരിക്കുകയാണ്. അഞ്ചു ഭാഷകളിൽ ആണ് ഈ ചിത്രത്തിന്റെ ടൈറ്റിൽ പോസ്റ്റർ റിലീസ് ചെയ്തിരിക്കുന്നത്. വിശാലിന്റെ കരിയറിലെ മുപ്പത്തിരണ്ടാമത്തെ ചിത്രമാണ് ലാത്തി. കഴിഞ്ഞ വർഷം പുറത്തു വന്ന ഇതിന്റെ ടൈറ്റിൽ ടീസറിന് വലിയ വരവേൽപ്പാണ് സോഷ്യൽ മീഡിയയിൽ നിന്നും ലഭിച്ചത്. തെലുങ്ക്- തമിഴ് താരം സുനൈന ആണ് ഈ ചിത്രത്തിലെ നായികാ വേഷം ചെയ്യുന്നത്. തമിഴിലെ നായക നടന്മാരായ, ഉറ്റ സുഹൃത്തുക്കള്‍ കൂടിയായ, രമണയും നന്ദയും ചേര്‍ന്നാണ് റാണാ പ്രൊഡക്ഷന്റെ ബാനറില്‍ ഈ ചിത്രം നിർമ്മിക്കുന്നത്.
നവാഗതനായ ഏ. വിനോദ് കുമാർ രചിച്ചു സംവിധാനം ചെയ്തിരിക്കുന്ന ഈ ചിത്രം ഏറെ പ്രതീക്ഷകളോടെയാണ് വിശാൽ ആരാധകർ കാത്തിരിക്കുന്നത്. സണ്‍ ടിവിയിലെ ജനപ്രിയ പരിപാടിയായിരുന്നു ‘നാം ഒരുവര്‍’ നിര്‍മ്മിച്ച് മിനിസ്‌ക്രീനില്‍ വിജയം നേടിയ നിർമ്മാതാക്കൾ ആണ് രമണയും നന്ദയും. വൈകാരിക മുഹൂർത്തങ്ങൾ ഏറെയുള്ള ഒരു ആക്ഷൻ ത്രില്ലർ ആയിരിക്കും ഈ ചിത്രമെന്ന സൂചനയാണ് ഇപ്പോൾ ലഭിക്കുന്നത്. ബാലസുബ്രമണ്യം, ബാലകൃഷ്ണ തോട്ട എന്നിവർ ഛായാഗ്രഹണവും, യുവാൻ ശങ്കർ രാജ സംഗീത സംവിധാനവും നിര്‍വഹിക്കുന്ന ഈ ചിത്രം എഡിറ്റ് ചെയ്യുന്നത് എൻ ബി ശ്രീകാന്ത് ആണ്. പ്രശസ്ത നടൻ പ്രഭുവും ഒരു നിർണ്ണായക വേഷം ചെയ്യുന്ന ഈ ചിത്രത്തിലെ വില്ലൻ ആയി എത്തുന്നത് ഒരു മലയാളി നടൻ ആണെന്ന സൂചനയുണ്ട്. പീറ്റർ ഹെയ്‌ൻ ആണ് ലാത്തിക്ക് വേണ്ടി ആക്ഷൻ രംഗങ്ങൾ ഒരുക്കുന്നത്. ചാപ്റ്റർ ഓഫ് എനിമിറ്റി എന്നാണ് ഈ ചിത്രത്തിന്റെ ടൈറ്റിൽ പോസ്റ്ററിൽ ചിത്രത്തെ കുറിച്ച് പറയുന്നത്.
