തമിഴ് സിനിമയിൽ വമ്പൻ തിരിച്ചു വരവിനു ഒരുങ്ങുകയാണ് നടൻ സിമ്പു. ഗൗതം വാസുദേവ് മേനോൻ സംവിധാനം ചെയ്യുന്ന പുതിയ ചിത്രത്തിൽ സിമ്പു ആണ് നായക വേഷം ചെയ്യുന്നത്. ‘വിണ്ണൈതാണ്ടി വരുവായാ’ എന്ന എക്കാലത്തെയും ഹിറ്റ് ചിത്രം ഒരുക്കിയ ഈ കൂട്ടുകെട്ട് വീണ്ടും ഒന്നിക്കുന്ന ചിത്രത്തിന്റെ പേര് ‘വെന്ത് തനിന്തത് കാട്’ എന്നാണ്. ഷൂട്ടിംഗ് ആരംഭിച്ച ഈ ചിത്രത്തിന് വേണ്ടി സിമ്പു നടത്തിയ ഞെട്ടിക്കുന്ന രൂപമാറ്റം കണ്ടമ്പരന്നിരിക്കുകയാണ് ആരാധകരും സിനിമാ പ്രേമികളും. ഇത്ര വലിയ മേക് ഓവർ സിമ്പു എങ്ങനെ നടത്തി എന്നാണ് സിമ്പുവിന്റെ ചിത്രം കണ്ട ഓരോരുത്തരും ചോദിക്കുന്നത്. ഈ ചിത്രത്തിന് വേണ്ടി പതിനഞ്ചു കിലോ ശരീര ഭാരമാണ് സിമ്പു കുറച്ചതു. തന്റെ മുൻകാല ചിത്രവും പുതിയ ചിത്രവും സിമ്പു പങ്കു വെച്ചത് സോഷ്യൽ മീഡിയയിൽ വൈറൽ ആവുകയാണിപ്പോൾ.
ഒരു റൂറല്‍ ഡ്രാമ-ത്രില്ലര്‍ ആയാണ് ഗൗതം വാസുദേവ് മേനോൻ തന്റെ പുതിയ ചിത്രം ഒരുക്കുന്നത്. ഗൗതം വാസുദേവ് മേനോൻ- സിമ്പു ടീം നേരത്തെ ഒന്നിച്ചിട്ടുള്ളത് റൊമാന്‍റിക് ഡ്രാമകള്‍ക്കായാണ് എങ്കിലും ഇത്തവണ വളരെ വ്യത്യസ്തമായ ഒരു പ്രമേയവുമായാണ് ഇരുവരും എത്തുന്നത്. ഭാരതിയാറുടെ ‘അഗ്നികുഞ്‍ജൊണ്‍ഡ്രു കണ്ടേന്‍’ എന്നാരംഭിക്കുന്ന കവിതയിലെ വരികളില്‍ നിന്നാണ് സംവിധായകൻ തന്റെ ചിത്രത്തിന്റെ പേര് കണ്ടെത്തിയിരിക്കുന്നത്. സംഗീത മാന്ത്രികൻ എ ആർ റഹ്മാൻ ആണ് ഈ ചിത്രത്തിന് സംഗീത സംവിധാനം നിർവഹിക്കുന്നത്. വിണ്ണൈതാണ്ടി വരുവായ, അച്ചം എൻപത് മടമയ്യടാ എന്നീ ഗൗതം വാസുദേവ് മേനോൻ- സിമ്പു ചിത്രങ്ങൾക്ക് സംഗീതമൊരുക്കിയതും എ ആർ റഹ്മാൻ ആയിരുന്നു. വേൽസ് ഫിലിം ഇന്റർനാഷണൽ ആണ് ഈ പുതിയ ചിത്രം നിർമ്മിക്കുന്നത്.
