അനൂപ് മേനോനെ നായകനാക്കി നവാഗതനായ ബിബിന്‍ കൃഷ്ണ അണിയിച്ചൊരുക്കിയ ഇൻവെസ്റ്റിഗേഷൻ ത്രില്ലർ ആയ 21 ഗ്രാംസ് സർപ്രൈസ് വിജയമാണ് നേടിയെടുത്തത്. മാർച്ച് 18 നു റിലീസ് ചെയ്ത ഈ ചിത്രം ഗംഭീര പ്രേക്ഷക പ്രതികരണം ആണ് നേടിയത്. പ്രേക്ഷകർക്കും നിരൂപകർക്കും ഒപ്പം മലയാള സിനിമാ സംവിധായകരും ഈ ചിത്രത്തിന് പ്രശംസയുമായി എത്തി. സജി സുരേന്ദ്രൻ, ഷാജി കൈലാസ്, ജീത്തു ജോസഫ്, വിനയൻ എന്നിവർ അതിൽ ചിലരാണ്. ആ ലിസ്റ്റിലെ പുതിയ ആളാണ് സംവിധായകൻ രഞ്ജിത് ശങ്കർ. ഒരു ചിത്രം ഹിറ്റ് ആവാൻ വേണ്ടത് വലിയ താരങ്ങളോ, വമ്പൻ യൂട്യൂബ് ഹിറ്റുകളോ, റിലീസിന് മുൻപുള്ള ഹൈപ്പോ, കോലാഹലങ്ങളോ ഒന്നുമല്ല എന്നു പറയുകയാണ് രഞ്ജിത് ശങ്കർ.
അതിനു പകരം, 21 ഗ്രാംസ് പോലെ വളരെ മികച്ച ഒരു തിരക്കഥയും അതിനു വേണ്ടി മനസ്സും ശരീരവും കൊടുത്തു ജോലി ചെയ്യാൻ തയ്യാറുള്ള ഒരു കൂട്ടം കലാകാരന്മാരും മതി വിജയം നേടാൻ എന്നാണ് രഞ്ജിത് ശങ്കർ ഈ ചിത്രം കണ്ട് കുറിച്ചത്. ചിത്രത്തിന്റെ സംവിധായകൻ, ഇതിന്റെ സങ്കേതിക പ്രവർത്തകർ, അഭിനേതാക്കൾ എന്നിവർക്ക് അഭിനന്ദനങ്ങൾ നൽകുകയും ചെയ്‌തിട്ടുണ്ട്‌ അദ്ദേഹം. ദി ഫ്രണ്ട് റോ പ്രൊഡക്ഷന്‍സിന്റെ ബാനറില്‍ റിനീഷ് കെ എൻ നിർമ്മിച്ച ഈ ചിത്രത്തിൽ അനൂപ് മേനോൻ കൂടാതെ ലെന, സംവിധായകന്‍ രഞ്ജിത്, രണ്‍ജി പണിക്കര്‍, ലിയോണ ലിഷോയ്, ലെന, അനു മോഹന്‍, മാനസ രാധാകൃഷ്ണന്‍, നന്ദു, ശങ്കര്‍ രാമകൃഷ്ണന്‍, പ്രശാന്ത് അലക്സാണ്ടര്‍, ചന്തുനാഥ്, മറീന മൈക്കിള്‍, വിവേക് അനിരുദ്ധ് എന്നിവരും അഭിനയിച്ചിരിക്കുന്നു. നന്ദ കിഷോർ എന്ന പൊലീസ് ഉദ്യോഗസ്ഥൻ ആയാണ് അനൂപ് മേനോൻ ഈ ചിത്രത്തിൽ അഭിനയിച്ചിരിക്കുന്നത്.
