മെഗാസ്റ്റാർ മമ്മൂട്ടി നായകനായി എത്തുന്ന പുതിയ ചിത്രമായ ഒരു കുട്ടനാടൻ ബ്ലോഗിന്റെ റിലീസ് കാത്തിരിക്കുകയാണ് മമ്മൂട്ടി ആരാധകർ. ഓണചിത്രമായി തീയേറ്ററുകളിൽ എത്തുമെന്ന് കരുതപ്പെട്ടിരുന്ന ഈ ചിത്രം ഇപ്പോൾ ലഭിക്കുന്ന വിവര പ്രകാരം സെപ്റ്റംബർ പകുതിയോടെ തീയേറ്ററുകളിൽ റിലീസ് ചെയ്യുമെന്നാണ് സൂചന. സെപ്റ്റംബർ പതിനാലിന് ആയിരിക്കും ഒരു കുട്ടനാടൻ ബ്ലോഗ് റിലീസ് ചെയ്യാൻ സാധ്യത. ഏതായാലും ഈ ചിത്രത്തിലെ പുതിയ വീഡിയോ സോങ് നാളെ റിലീസ് ചെയ്യുകയാണ്. മാനത്തെ എന്ന വരിയോടെ തുടങ്ങുന്ന ഈ ഗാനം നാളെ വൈകുന്നേരം ഏഴു മണിക്കാണ് റിലീസ് ചെയ്യുക. ഇപ്പോൾ തന്നെ ഈ ചിത്രത്തിലെ രണ്ടു ഗാനങ്ങൾ റിലീസ് ചെയ്തു കഴിഞ്ഞു. ഏലംപടി എലേലോ എന്ന് തുടങ്ങുന്ന ഒരു ഗാനവും, നടൻ ഉണ്ണി മുകുന്ദൻ ആലപിച്ച മറ്റൊരു ഗാനവുമാണ് ഈ ചിത്രത്തിലേതായി മുൻപ് റിലീസ് ചെയ്തത്.
ശ്രീനാഥ് ശിവശങ്കരൻ സംഗീതം നൽകിയ ഈ ചിത്രത്തിലെ ഗാനങ്ങൾ ഇതിനോടകം തന്നെ പ്രേക്ഷക ശ്രദ്ധ നേടിയെടുത്തു കഴിഞ്ഞു. പ്രശസ്ത തിരക്കഥ രചയിതാവായ സേതു ആദ്യമായി സംവിധാനം ചെയ്ത ഒരു കുട്ടനാടൻ ബ്ലോഗ് നിർമ്മിച്ചിരിക്കുന്നത് അനന്ത വിഷന്റെ ബാനറിൽ മുരളീധരൻ , ശാന്ത മുരളീധരൻ എന്നിവർ ചേർന്നാണ്. ലക്ഷ്മി റായ്, അനു സിതാര, ഷംന കാസിം എന്നിവരാണ് ഈ ചിത്രത്തിലെ നായികാ വേഷങ്ങൾ അവതരിപ്പിക്കുന്നത്. ഇവരെ കൂടാതെ സണ്ണി വെയ്ൻ , ആദിൽ ഇബ്രാഹിം, സഞ്ജു ശിവറാം , ജേക്കബ് ഗ്രിഗറി, ഷഹീൻ സിദ്ദിഖ്, നെടുമുടി വേണു, സോഹൻ സീനുലാല് തുടങ്ങിയവരും ഒരു കുട്ടനാടൻ ബ്ലോഗിന്റെ താര നിരയുടെ ഭാഗം ആണ്. പ്രദീപ് നായർ കാമറ ചലിപ്പിച്ചിരിക്കുന്ന ഈ ചിത്രം ഒരു കളർഫുൾ ഫാമിലി എന്റെർറ്റൈനെർ ആയാണ് ഒരുക്കിയിരിക്കുന്നത്.
