യുവ താരം ദുൽഖർ സൽമാൻ നായകനായി എത്തിയ ഏറ്റവും പുതിയ ചിത്രമാണ് കുറുപ്പ്. സെക്കന്റ് ഷോ, കൂതറ എന്നിവക്ക് ശേഷം ശ്രീനാഥ് രാജേന്ദ്രൻ ഒരുക്കിയ ഈ ചിത്രം നിർമ്മിച്ചിരിക്കുന്നതും ദുൽഖർ സൽമാൻ ആണ്. നവംബർ പന്ത്രണ്ടിനു ലോകം മുഴുവൻ 5 ഭാഷയിൽ റിലീസ് ചെയ്ത ഈ ചിത്രം മികച്ച പ്രതികരണമാണ് നേടിയത്. വമ്പൻ ഓപ്പണിങ് സ്വന്തമാക്കിയ ഈ ചിത്രം ഇപ്പോഴിതാ അൻപത് കോടി ആഗോള കളക്ഷൻ നേടി എന്നാണ് ദുൽക്കർ സൽമാൻ തന്നെ ഔദ്യോഗികമായി പ്രഖ്യാപിച്ചിരിക്കുന്നത്. ആദ്യമായാണ് ഒരു ദുൽഖർ ചിത്രം 50 കോടി ക്ലബ്ബിൽ എത്തുന്നത് എന്ന പ്രത്യേകതയും ഉണ്ട്.
ദൃശ്യം, പ്രേമം, എന്നു നിന്റെ മൊയ്‌ദീൻ, ഒപ്പം, ടു കൺഡ്രീസ്, പുലി മുരുകൻ, കായംകുളം കൊച്ചുണ്ണി, ഒടിയൻ, ഞാൻ പ്രകാശൻ, ലുസിഫെർ എന്നിവയാണ് ഇതിനു മുൻപ് അൻപത് കോടി ക്ലബ്ബിൽ ഇടം നേടിയ മലയാള ചിത്രങ്ങൾ. അതിൽ പുലി മുരുകൻ, ലുസിഫെർ എന്നിവ നൂറു കോടി ക്ലബിലും ഇടം പിടിച്ച ചിത്രമാണ്. അഞ്ചു ദിവസം കൊണ്ടാണ് കുറുപ്പ് ഈ നേട്ടത്തിൽ എത്തിയത്. കേരളത്തിൽ നിന്ന് 16 കോടിയോളം നേടിയ കുറുപ്പ് ഗൾഫിൽ നിന്നും 16 കോടിക്കു മുകളിൽ നേടി. റെസ്റ്റ് ഓഫ് ഇന്ത്യ മാർക്കറ്റിൽ നിന്നും 10 കോടിയോളം ആണ് കുറുപ്പ് നേടിയ കളക്ഷൻ എന്ന് ട്രേഡ് അനലിസ്റ്റുകൾ സൂചിപ്പിക്കുന്നു. കുപ്രസിദ്ധ പിടികിട്ടാപ്പുള്ളി ആയ സുകുമാര കുറുപ്പിന്റെ ജീവിത കഥയാണ് ഈ ചിത്രം പറയുന്നത്. ടോവിനോ തോമസ്, സണ്ണി വെയ്ൻ, ഇന്ദ്രജിത് സുകുമാരൻ, ഷൈൻ ടോം ചാക്കോ, ശോഭിത ധുലിപാല, ഭരത്, സുരഭി ലക്ഷ്മി, ആനന്ദ് ബാൽ, എം ആർ ഗോപകുമാർ, ശിവജിത് പദ്മനാഭൻ, ബിബിൻ പെരുമ്പിള്ളിക്കുന്നേൽ, ഹാരിഷ് കണാരൻ എന്നിവരും ഈ ചിത്രത്തിൽ അഭിനയിച്ചിട്ടുണ്ട്.
