ഇപ്പോൾ ഒരുപിടി മികച്ച ചിത്രങ്ങൾ കയ്യിലുള്ള മലയാള താരമാണ് കുഞ്ചാക്കോ ബോബൻ. ഒരുപിടി വലിയ ചിത്രങ്ങളും അദ്ദേഹം നായകനായി എത്തുന്നുണ്ട്. മഹേഷ് നാരായണൻ ഒരുക്കുന്ന അറിയിപ്പ് എന്ന ചിത്രം തീർത്ത കുഞ്ചാക്കോ ബോബൻ ഇപ്പോൾ ചെയ്യുന്നത് രതീഷ് ബാലകൃഷ്ണൻ ഒരുക്കുന്ന എന്നാ താൻ കേസ് കൊട് എന്ന ചിത്രമാണ്. തന്റെ നിർമ്മാണ കമ്പനിയായ ഉദയായുടെ ബാനറിൽ കുഞ്ചാക്കോ ബോബൻ തന്നെയാണ് മഹേഷ് നാരായണൻ ചിത്രം നിർമ്മിക്കുന്നത്. ഇപ്പോഴിതാ, നോണ്‍സെന്‍സ് എന്ന സ്പോർട്സ് ചിത്രം ഒരുക്കിയ എം.സി. ജിതിന്‍ തിരക്കഥയെഴുതി സംവിധാനം ചെയ്യുന്ന അടുത്ത ചിത്രത്തിൽ നായകനായി അഭിനയിക്കാൻ പോവുകയാണ് കുഞ്ചാക്കോ ബോബൻ. സമീര്‍ താഹിറും ഷൈജു ഖാലിദും ആഷിക് ഉസ്മാനും ചേർന്ന് നിർമ്മിക്കുന്ന ഈ ചിത്രത്തിന്റെ ടൈറ്റിൽ ഇട്ടിട്ടില്ല. ഇതിന്റെ കാസ്റ്റിംഗും ഇപ്പോൾ പുരോഗമിക്കുകയാണ്.
നവാഗതനായ കമൽ കെ എം ഒരുക്കിയ പട എന്നാ ചിത്രമാണ് കുഞ്ചാക്കോ ബോബന്റെ അടുത്ത റിലീസ്. മാർച്ച് പത്തിന് ആണ് പട റിലീസ് ചെയ്യുന്നത്. ഒരു സോഷ്യൽ ത്രില്ലർ ആണ് ഈ ചിത്രമെന്ന സൂചനയാണ് ഇതിന്റെ ട്രൈലെർ നമ്മുക്ക് തരുന്നത്. ഇത് കൂടാതെ ഫില്ലിനി ഒരുക്കിയ ഒറ്റു എന്നാ മലയാളം / തമിഴ് ദ്വിഭാഷാ ചിത്രവും കുഞ്ചാക്കോ ബോബൻ നായകനായി എത്തുന്നുണ്ട്. എന്താടാ സജീ, പകലും പാതിരാവും, പദ്മിനി, ആറാം പാതിരാ, ഗർ, മറിയം ടൈലേഴ്സ് എന്നിവയും കുഞ്ചാക്കോ ബോബൻ ചെയ്യാൻ പോകുന്ന ചിത്രങ്ങളാണ്. നേരത്തെ ആഷിഖ് അബു ഒരുക്കുന്ന നീലവെളിച്ചത്തിൽ കുഞ്ചാക്കോ ബോബൻ അഭിനയിക്കും എന്ന് പ്രഖ്യാപിച്ചിരുന്നെങ്കിലും ഡേറ്റ് ക്ലാഷുകൾ മൂലം അദ്ദേഹം അതിൽ നിന്ന് പിന്മാറിയിരുന്നു.
