ഇപ്പോൾ സോഷ്യൽ മീഡിയയിൽ ചർച്ചാ വിഷയം ആയിരിക്കുന്നത് സ്ഫടികം 2 എന്ന ചിത്രമൊരുങ്ങുന്നതിനെ പറ്റിയുള്ള വിവാദങ്ങൾ ആണ്. ബിജു ജെ കട്ടക്കൽ എന്നൊരു സംവിധായകൻ സ്ഫടികം 2 എന്ന ചിത്രവുമായി എത്തുകയാണെന്നു പ്രഖ്യാപിച്ചതോടെ ഒരുപാട് പേര് അതിനെതിരെ രംഗത്ത് വന്നു. മോഹൻലാലിനെ നായകനാക്കി സ്ഫടികം എന്ന ബ്ലോക്ക്ബസ്റ്റർ ചിത്രം ഒരുക്കിയ സംവിധായകൻ ഭദ്രനും ഈ നീക്കത്തിനെതിരെ രംഗത്ത് വന്നു കഴിഞ്ഞു. സ്ഫടികം ഇറങ്ങി മലയാളത്തിലെ എക്കാലത്തെയും മികച്ച മാസ്സ് ഹിറ്റ് ആയ കാലത്തു തന്നെ ഇതിന്റെ രണ്ടാം ഭാഗം ആവശ്യപ്പെട്ടു കൊണ്ട് നിർമ്മാതാവ് ഗുഡ് നൈറ്റ് മോഹൻ തന്നെ സമീപിച്ചിരുന്നെന്നും, എന്നാൽ അന്ന് തന്നെ താൻ ആ ക്ഷണം നിരസിച്ചതാണെന്നും ഭദ്രൻ പറയുന്നു. 65 ലക്ഷം രൂപയുടെ ബെൻസ് തനിക്കു തരാം എന്ന വാഗ്ദാനവുമായാണ് അന്ന് നിർമ്മാതാവ് വന്നത് എന്നും എന്നിട്ടു പോലും സ്ഫടികത്തിനു രണ്ടാം ഭാഗം താൻ ചെയ്യാത്തതിന് കാരണം ഉണ്ടെന്നും ഭദ്രൻ പറയുന്നു.
സിനിമയുടെ കഥയൊന്നും തനിക്കു പ്രശ്‌നമില്ല എന്നും , രണ്ടു കാര്യങ്ങള്‍ ഈ സിനിമയില്‍ ഉണ്ടായാല്‍ മതി എന്നുമാണ് അന്ന് നിർമ്മാതാവ് പറഞ്ഞത് . ഒന്ന്, ഇതിലെ തുണി പറിച്ച് ഇടി. രണ്ട്, കറുപ്പും ചുവപ്പും ഷോര്‍ട്‌സിട്ട് റെയ്ബാന്‍ ഗ്ലാസ്സും വച്ചുള്ള രംഗം. അപ്പോൾ ഭദ്രന്റെ മറുപടി ഇപ്രകാരം ആയിരുന്നു. ചെകുത്താന്‍ എന്നെഴുതിയ അപ്പന്‍, തന്റെ മകന്‍ ചെകുത്താനായിരുന്നില്ല, സ്ഫടികമായിരുന്നു എന്നു തിരിച്ചറിയുന്നതാണ് ആ സിനിമയുടെ കാതല്‍. അങ്ങനെ എന്നെന്നേക്കുമായി ചെകുത്താനെ മായ്ച്ച് സ്ഫടികം എന്നെഴുതിവച്ചു പോയ ആ അപ്പന്‍ വില്ലന്മാരാല്‍ കൊല്ലപ്പെടുകയും മകന്‍ ജയിലിലേക്ക് പോകുകയും ചെയ്യുന്നു. ആ മകന്‍ തിരിച്ചുവന്ന് വീണ്ടും ചെകുത്താനാകുമോ? അതിലൊരു മാറ്റം നമ്മൾ ഉണ്ടാക്കി കഴിഞ്ഞെന്നും തന്റെ പ്രശ്നം അപ്പൻ എന്ന് മനസ്സിലാക്കിയോ അന്ന് ചെകുത്താൻ എന്നുള്ളത് മാറി തോമ സ്ഫടികം ആയെന്നും ഭദ്രൻ പറയുന്നു. പിന്നെ എങ്ങനെയാണു സ്ഫടികത്തിനു ഒരു രണ്ടാം ഭാഗം വരിക എന്നും ഭദ്രൻ ചോദിക്കുന്നു. എങ്ങനെ നോക്കിയാലും ഈ ചിത്രത്തിന് ഒരു രണ്ടാം ഭാഗം ഉണ്ടാക്കാൻ ഉള്ള സാധ്യത ഇല്ലെന്നും ചിത്രത്തിന്റെ രചയിതാവ് കൂടിയായ ഭദ്രൻ പറയുന്നു. അത് കൊണ്ട് തന്നെ സ്ഫടികത്തിനു ഒരു രണ്ടാം ഭാഗം വരില്ല എന്നതിൽ അദ്ദേഹം ഉറച്ചു നിൽക്കുകയാണ്.
