ദളപതി വിജയ് നായകനായി എത്തുന്ന ഏറ്റവും പുതിയ ചിത്രമാണ് ബീസ്റ്റ്. ഈ ബിഗ് ബഡ്ജറ്റ് സ്റ്റൈലിഷ് മാസ്സ് ചിത്രത്തിന്റെ റിലീസ് ഡേറ്റ് നേരത്തെ തന്നെ ഒഫീഷ്യൽ ആയി അണിയറ പ്രവർത്തകർ പ്രഖ്യാപിച്ചിരുന്നു. ഏപ്രിൽ പതിമൂന്നിന് ആണ് ആഗോള റിലീസ് ആയി ബീസ്റ്റ് എത്തുന്നത്. ഇപ്പോഴിതാ ഈ ചിത്രത്തിന്റെ ട്രയ്ലർ റിലീസ് ഡേറ്റും എത്തിയിരിക്കുകയാണ്. ആരാധകരെ ആവേശം കൊള്ളിക്കുന്ന പ്രഖ്യാപനം ഇപ്പോൾ സോഷ്യൽ മീഡിയയിൽ തീപോലെ ആളിപടർന്നു കഴിഞ്ഞു. ചിത്രത്തിന്റെ ട്രെയ്‌ലർ വരുന്ന ഏപ്രിൽ രണ്ടിന് എത്തുമെന്നാണ് ഇപ്പോൾ സംവിധായകൻ അറിയിച്ചിരിക്കുന്നത്. നെൽസൺ ദിലീപ്കുമാർ രചിച്ചു സംവിധാനം ചെയ്ത ഈ ചിത്രം സൺ പിക്ചേഴ്സ് ആണ് നിർമ്മിച്ചിരിക്കുന്നത്. ഇതിലെ രണ്ടു ഗാനങ്ങൾ ഇതിനോടകം പുറത്തു വന്നു സൂപ്പർ ഹിറ്റായിട്ടുണ്ട്. ഇതിലെ ആദ്യ ഗാനമായ അറബിക് കുത്ത് ലിറിക് വീഡിയോ യൂട്യൂബിൽ റെക്കോർഡുകൾ സൃഷ്ടിച്ചു മുന്നേറുകയാണ്. ശിവകാർത്തികേയൻ രചിച്ച ആ ഗാനം ആലപിച്ചത് സംഗീത സംവിധായകൻ അനിരുദ്ധ്, ജോണിത ഗാന്ധി എന്നിവർ ചേർന്നാണ്.
ഇതിലെ രണ്ടാമത്തെ ഗാനമായ ജോളിയാ ജിംഖാന ആലപിച്ചത് ദളപതി വിജയ് ആയിരുന്നു. കു കാർത്തിക് വരികൾ രചിച്ചിരിക്കുന്ന ഈ ഗാനത്തിൻന്റെ ലിറിക് വീഡിയോയും സൂപ്പർ ഹിറ്റായി. അനിരുദ്ധ് രവിചന്ദർ സംഗീതം ഒരുക്കിയ ഈ ചിത്രത്തിന് കാമറ ചലിപ്പിച്ചത് മനോജ് പരമഹംസയും എഡിറ്റിംഗ് നിർവഹിക്കുന്നത് ആർ നിർമ്മലും ആണ്. പൂജ ഹെഗ്‌ഡെ നായികാ വേഷം ചെയ്ത ഈ ചിത്രത്തിൽ യോഗി ബാബു, ഷൈൻ ടോം ചാക്കോ, വിടിവി ഗണേഷ്, അപർണ്ണ ദാസ്, പുകഴ് എന്നിവരും അഭിനയിച്ചിട്ടുണ്ട്.
