മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ നായകനായി പ്രഖ്യാപിക്കപ്പെട്ട വമ്പൻ ചിത്രമാണ് കാളിയൻ. ഏതാനും വർഷങ്ങൾക്കു മുൻപ് പ്രഖ്യാപിച്ച ഈ ചിത്രം, ഇതിന്റെ വലിപ്പം കാരണവും പിന്നീട് വന്ന കോവിഡ് സാഹചര്യങ്ങൾ കാരണവും നീണ്ടു പോവുകയായിരുന്നു. ഏതായാലും ഈ വർഷം തന്നെ ചിത്രീകരണം ആരംഭിക്കാൻ പ്ലാൻ ചെയ്യുന്ന ഈ ചിത്രത്തിന്റെ കാസ്റ്റിംഗ് കാൾ കുറച്ചു ദിവസം മുൻപ് പുറത്തു വിട്ടിരിക്കുന്നു. അതിനു വേണ്ടി നടക്കുന്ന ഓഡിഷന് രജിസ്റ്റർ ചെയ്യാൻ ഇപ്പോൾ കൊച്ചിയിൽ വമ്പൻ ജനാവലിയാണ് എത്തിച്ചേർന്നിരിക്കുന്നത്. കോരിച്ചൊരിയുന്ന മഴയിലും മോശം കാലാവസ്ഥയിലും, ഒരുപാട് ബുദ്ധിമുട്ടിയാണ് സിനിമ മോഹികളായ പുതുമുഖങ്ങൾ ഇതിന്റെ ഓഡിഷന് വേണ്ടി എത്തിയിരിക്കുന്നത്. തിരക്ക് നിയന്ത്രിക്കാൻ പോലീസ് വരെ രെജിസ്ട്രേഷൻ നടക്കുന്ന സ്ഥലത്ത് എത്തിച്ചേർന്നിട്ടുണ്ട്. കൊച്ചിയിൽ നിന്നുള്ള ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലായി മാറുകയാണ്. ചരിത്ര കഥാപാത്രങ്ങളുടെ രൂപഭാവങ്ങളുണ്ടോയെന്നും, ഉണ്ടെങ്കിൽ കാളിയനൊപ്പം കൂടാം, ചരിത്രത്തിന്റെ ഭാഗമാകാമെന്ന വാക്കുകളോടെയാണ് ഈ കാസ്റ്റിംഗ് കാൾ പുറത്തു വന്നത്.
https://youtube.com/shorts/ingjfaTrGnI
ഏഴു വയസ്സ് മുതൽ എഴുപതു വയസ്സു വരെയുള്ള ആണുങ്ങൾക്കും പെണ്ണുങ്ങൾക്കും ഈ ചിത്രത്തിലഭിനയിക്കാനുള്ള അവസരമുണ്ട്. ഇന്നും നാളെയുമായി കൊച്ചി വൈ എം സി എ ഹാളിൽ വെച്ചാണ് ഓഡിഷന് പങ്കെടുക്കാനാഗ്രഹിക്കുന്നവരുടെ സ്പോട് രെജിസ്ട്രേഷൻ നടക്കുന്നത്. നവാഗതനായ എസ് മഹേഷ് സംവിധാനം ചെയ്യാൻ പോകുന്ന ഈ ചിത്രം, വേണാട് ചരിത്രത്തിലെ വീരപുരുഷനും പടത്തലവനുമായ ഇരവിക്കുട്ടിപ്പിള്ളയുടെയും, ആത്മ മിത്രം കുഞ്ചിറക്കോട്ട് കാളിയുടെയും കഥയാണ് പറയുക. മാധ്യമപ്രവര്‍ത്തകനായ ബി ടി അനില്‍ കുമാര്‍ തിരക്കഥ രചിച്ചിരിക്കുന്ന ഈ ചിത്രം മാജിക് മൂണ്‍ പ്രൊഡക്ഷന്‍സിന്റെ ബാനറില്‍ രാജീവ് ഗോവിന്ദനാണ് നിർമ്മിക്കാൻ പോകുന്നത്. സുജിത് വാസുദേവ് ക്യാമറ ചലിപ്പിക്കാൻ പോകുന്ന ഈ ചിത്രത്തിന് സംഗീതം ഒരുക്കുന്നത് ശങ്കർ- ഇഹ്‌സാൻ- ലോയ് ടീമാണ്.
