ഇന്ത്യൻ മുഴുവൻ തരംഗമായി തീർന്ന കെ ജി എഫ് 2 എന്ന കന്നഡ ചിത്രം ഇപ്പോൾ ഒടിടി സ്ട്രീമിങ്ങിലും സൂപ്പർ ഹിറ്റാവുകയാണ്. റോക്കിങ് സ്റ്റാർ യാഷ് നായകനായ ഈ ബ്രഹ്മാണ്ഡ ആക്ഷൻ ചിത്രമൊരുക്കിയത് പ്രശാന്ത് നീലാണ്. ഹോംബാലെ ഫിലിംസ് നിർമ്മിച്ച ഈ ചിത്രം 1200 കോടിക്ക് മുകളിലാണ് ആഗോള കളക്ഷനായി നേടിയത്. ഇതിന് ഇനി ഒരു മൂന്നാം ഭാഗം കൂടിയുണ്ടാകുമെന്നും അണിയറ പ്രവർത്തകർ വെളിപ്പെടുത്തിയിട്ടുണ്ട്. അഞ്ച് ഭാഷകളിൽ റിലീസ് ചെയ്ത ഈ ചിത്രത്തിന്റെ ഹൈലൈറ്റ് ഇതിലെ കിടിലൻ ആക്ഷൻ സീനുകളാണ്. ഇപ്പോഴിതാ ഈ ചിത്രത്തിന്റെ ഒരു മേക്കിങ് വീഡിയോ പുറത്തുവന്നിരിക്കുകയാണ്. പ്രേക്ഷകരെ ഞെട്ടിച്ച, ഇതിലെ ആക്ഷൻ രംഗങ്ങൾ എങ്ങനെയാണു ഷൂട്ട് ചെയ്തതെന്നാണ് ഈ മേക്കിങ് വീഡിയോയിൽ കാണിക്കുന്നത്. എത്രത്തോളം ആളുകളുടെ പരിശ്രമത്തിന്റെ ഫലമാണ് നമ്മൾ സ്‌ക്രീനിൽ കണ്ടതെന്നും ഈ മേക്കിങ് വീഡിയോ നമ്മുക്ക് കാണിച്ചു തരുന്നുണ്ട്. കെ ജി എഫ് 2വിന് സംഘട്ടന രംഗങ്ങൾ ഒരുക്കിയിരിക്കുന്നത് അൻപ്അറിവാണ്.
റോക്കി ഭായ് എന്ന കേന്ദ്ര കഥാപാത്രമായി യാഷ് എത്തിയ ഈ ചിത്രത്തിലെ വില്ലനായി അഭിനയിച്ചത് ബോളിവുഡ് താരമായ സഞ്ജയ് ദത്താണ്. ശ്രീനിഥി ഷെട്ടി നായികാ വേഷം ചെയ്ത ഈ ചിത്രത്തിൽ രവീണ ടണ്ഠൻ, പ്രകാശ് രാജ്, റാവു രമേശ് എന്നിവരും വേഷമിട്ടിട്ടുണ്ട്. നൂറ് കോടി രൂപ മുതൽ മുടക്കിലാണ് ഈ ചിത്രം നിർമ്മിച്ചത്. രവി ബസ്‌റൂർ ഈണം നൽകിയ ഇതിലെ ഗാനങ്ങളും സൂപ്പർ ഹിറ്റായി മാറിയിരുന്നു. ചിത്രത്തിന്റെ വിജയത്തിൽ ആ ഗാനങ്ങളും പശ്‌ചാത്തല സംഗീതവും വഹിച്ച പങ്കു വളരെ വലുതാണ്, കേരളത്തിലും മെഗാ ബ്ലോക്ക്ബസ്റ്ററായി മാറിയ കെ ജി എഫ് 2 ഇവിടെ നിന്ന് കളക്ഷനായി നേടിയത് അറുപതു കോടി രൂപയ്ക്കു മുകളിലാണ്.
