തെലുങ്കിലെ സൂപ്പർ താരമായ നന്ദമുറി ബാലകൃഷ്ണ എന്ന ബാലയ്യ നായകനായ പുതിയ ചിത്രം ഡിസംബർ രണ്ടിന് റിലീസ് ചെയ്യാൻ പോവുകയാണ്. അഖണ്ഡ എന്ന് പേരിട്ടിരിക്കുന്ന ഈ ചിത്രത്തിന്റെ ടീസർ, ട്രൈലെർ എന്നിവ നേരത്തെ തന്നെ പുറത്തു വരികയും സൂപ്പർ ഹിറ്റായി മാറുകയും ചെയ്തിരുന്നു. ഇപ്പോഴിതാ ഈ ചിത്രത്തിലെ ഒരു വീഡിയോ സോങ് യൂട്യൂബിൽ ട്രെൻഡിങ് ആയി മാറുകയാണ്. ജയ് ബാലയ്യ എന്ന ഈ ഗാനം രചിച്ചത് അനന്ത ശ്രീറാമും ഇതിനു ഈണം നൽകിയത് തമൻ എസുമാണ്. ഗീത മാധുരി, സത്യാ യാമിനി, അദിതി ബവരാജു, സാഹിതി ചഗാന്റി എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്. വളരെ കളർഫുൾ ആയി ഒരുക്കിയ ഈ ഗാനത്തിൽ ബാലയ്യയുടെ നൃത്ത ചുവടുകളും നമ്മുക്ക് കാണാൻ സാധിക്കും. ഇതിനോടകം എഴുപതു ലക്ഷത്തിലധികം കാഴ്ചക്കാരെയാണ് ഈ ഗാനത്തിന് ലഭിച്ചിരിക്കുന്നത്.
സൂപ്പർ ഹിറ്റ് സംവിധായകനായ ബോയപ്പട്ടി ശ്രീനു ഒരുക്കിയ ഈ ചിത്രം, ദ്വാരക ക്രിയേഷൻസിന്റെ ബാനറിൽ മിര്യാല രവിന്ദർ റെഡ്ഢിയാണ് നിർമ്മിച്ചിരിക്കുന്നത്. നന്ദമുറി ബാലകൃഷ്ണയുടെ 106 ആം ചിത്രമാണ് ഇത് എന്ന് മാത്രമല്ല, അദ്ദേഹം ഇരട്ട വേഷത്തിലാണ് ഇതിൽ എത്തുന്നത് എന്നും സൂചനയുണ്ട്. ബാലയ്യയുടെ കിടിലൻ ആക്ഷൻ രംഗങ്ങൾ ആണ് ഈ ചിത്രത്തിന്റെ ഏറ്റവും വലിയ ഹൈലൈറ്റ് എന്നും ഇതിന്റെ ട്രൈലെർ പറയുന്നു. പ്രഘ്യാ ജൈസ്വാൾ, ശ്രീകാന്ത് എന്നിവരും അഭിനയിക്കുന്ന ഈ ചിത്രം വമ്പൻ ബഡ്ജറ്റിലാണ് ഒരുക്കിയിരിക്കുന്നത്. സിംഹ, ലെജൻഡ് എന്നീ ചിത്രങ്ങൾക്ക് ശേഷം ബാലയ്യ- ബോയപ്പട്ടി ശ്രീനു ടീം ഒന്നിച്ച ചിത്രം കൂടിയാണിത്.
