ആരാധകരുടെ ആകാംഷ നിറഞ്ഞ കാത്തിരിപ്പിനൊടുവിൽ ഹൃദയത്തിലെ ദർശന സോങ് ഇന്ന് റിലീസ് ചെയ്തു. റിലീസ് ചെയ്ത നിമിഷം മുതൽ സോഷ്യൽ മീഡിയയിൽ വമ്പൻ ഹിറ്റായി മാറിയിരിക്കുകയാണ് ഈ ഗാനം. ഒരു ട്രെൻഡ് സെറ്റർ ആയി മാറും ഈ ഗാനം എന്നാണ് പ്രേക്ഷകർ ഒന്നടങ്കം അഭിപ്രായപ്പെടുന്നത്. പ്രണവ് മോഹൻലാൽ കാഴ്ച വെച്ച ത്രസിപ്പിക്കുന്ന പ്രകടനം തന്നെയാണ് ഈ ഗാനത്തിന്റെ ഹൈലൈറ്റ്. ഹിഷാം അബ്ദുൽ വഹാബ് ഈണം പകർന്ന ഈ ഗാനം പാടിയിരിക്കുന്നത് ഹിഷാം അബ്ദുൽ വഹാബും നായികയായ ദർശന രാജേന്ദ്രനും ചേർന്നാണ്. അരുൺ ആലാട്ട് ആണ് ഈ ഗാനത്തിന് വരികൾ രചിച്ചിരിക്കുന്നത്.
വിനീത് ശ്രീനിവാസൻ രചിച്ചു സംവിധാനം ചെയ്ത ഈ ചിത്രത്തിന്റെ റിലീസ് സമയം കൂടി ഈ ഗാനത്തിന് ഒപ്പം പുറത്തു വിട്ടിട്ടുണ്ട്. അടുത്ത വർഷം ജനുവരിയിൽ ആണ് ഹൃദയം തീയേറ്ററിൽ എത്തുക എന്നാണ് ഇന്ന് അവർ പുറത്തു പറഞ്ഞിരിക്കുന്നത്. മെറിലാൻഡ് സിനിമാസിന്റെ ബാനറില്‍ വിശാഖ് സുബ്രഹ്മണ്യം നിർമ്മിക്കുന്ന ഈ ചിത്രത്തിന് ക്യാമറ ചലിപ്പിച്ചത് വിശ്വജിത്തും എഡിറ്റ് ചെയ്‌തത്‌ രഞ്ജൻ എബ്രഹാമുമാണ്. കല്യാണി പ്രിയദർശൻ, ദർശന രാജേന്ദ്രൻ എന്നിവർ നായികമാരായി എത്തുന്ന ഹൃദയത്തിൽ അജു വർഗീസും ഒരു പ്രധാന വേഷം ചെയ്യുന്നുണ്ട്.
ഇത് കൂടാതെ ഒട്ടേറെ പുതു മുഖങ്ങളും ഈ ചിത്രത്തിന്റെ താരനിരയിൽ ഉണ്ട്. ഒരു ചെറുപ്പക്കാരന്റെ 17 വയസ്സ് മുതൽ 30 വയസ്സുവരെയുള്ള ജീവിത യാത്രയുടെ കഥയാണ് ഈ ചിത്രം പറയുന്നത് എന്ന് വിനീത് ശ്രീനിവാസൻ നേരത്തെ പറഞ്ഞിരുന്നു. കിടിലൻ ലുക്കിലാണ് ദർശന എന്ന ഗാനത്തിൽ പ്രണവ് മോഹൻലാൽ പ്രത്യക്ഷപ്പെട്ടിരിക്കുന്നത്. ദർശന രാജേന്ദ്രനും ഈ ഗാനത്തിൽ അഭിനയിച്ചിട്ടുണ്ട്.
