പ്രശസ്ത ബോളിവുഡ് താരം രാജ്കുമാർ റാവുവും ഭൂമി പട്നേക്കറും നായകനും നായികയുമായി എത്തുന്ന ഏറ്റവും പുതിയ ചിത്രമാണ് ബധായി ദോ. സ്വവർഗാനുരാഗം പ്രമേയമായി വരുന്ന ഈ പുതിയ ചിത്രം ഹർഷവർദ്ധൻ കുൽക്കർണിയാണ് സംവിധാനം ചെയ്തിരിക്കുന്നത്. ഈ ചിത്രത്തിന്റെ ട്രൈലെർ ഇപ്പോൾ വലിയ രീതിയിലാണ് സോഷ്യൽ മീഡിയയിൽ ചർച്ചയാവുന്നതു. ഫെബ്രുവരി പതിനൊന്നിന് ആണ് ഈ ചിത്രം തീയേറ്ററുകളിൽ എത്തുന്നത്. സീമ പഹ്വ, ഷീബ ചദ്ദ, ലവ്ലീൻ മിശ്ര, നിതേശ് പാണ്ഡെ, ശശി ഭൂഷൺ, ദീപക് അറോറ എന്നിവരും പ്രധാന വേഷങ്ങൾ ചെയ്യുന്ന ഈ ചിത്രം ഹാസ്യത്തിന്റെ മേമ്പൊടി ചാലിച്ചാണ് കഥ പറയുന്നത് എന്ന് ഇതിന്റെ ട്രൈലെർ നമുക്ക് കാണിച്ചു തരുന്നു. ഒരു പോലീസ് ഉദ്യോഗസ്ഥന്റെ വേഷത്തിൽ രാജ്കുമാർ എത്തുന്ന ചിത്രത്തിൽ പി.ടി ടീച്ചറായാണ് ഭൂമി അഭിനയിച്ചിരിക്കുന്നത്.
അക്ഷത് ഗിൽഡിയാൽ, സുമൻ അധികാരി, ഹർഷവർദ്ധൻ കുൽക്കർണി എന്നിവർ ചേർന്ന് തിരക്കഥ രചിച്ച ഈ ചിത്രം വിനീത് ജെയ്ൻ ആണ് നിർമ്മിച്ചിരിക്കുന്നത്. സ്വവർഗാനുരാഗം പ്രമേയമായി ഒരുക്കുന്ന ആദ്യത്തെ ബോളിവുഡ് ചിത്രമല്ല ഇത്. നേരത്തെ ആയുഷ്മാൻ ഖുറാനെ നായകനായി എത്തിയ ശുഭ് മംഗൾ സ്യാദ സാവധാൻ എന്ന ചിത്രം സ്വവർഗാനുരാഗികളായ കഥാപാത്രങ്ങളുടെ കഥയാണ് പറഞ്ഞത്. ആ ചിത്രവും മികച്ച പ്രേക്ഷക ശ്രദ്ധ നേടിയെടുത്തിരുന്നു. അതിൽ ആണുങ്ങൾക്കിടയിലെ സ്വവര്ഗാനുരാഗമാണ് വിഷയം ആയതു എങ്കിൽ ബദായി ദോ എന്ന ഈ പുതിയ ചിത്രത്തിൽ ആണുങ്ങളുടേയും പെണ്ണുങ്ങളുടേയും ഇടയിലെ സ്വവര്ഗാനുരാഗത്തിന്റെ കഥയാണ് പറയുന്നത്. ഏതായാലും ഇതിന്റെ ട്രൈലെർ വലിയ പ്രതീക്ഷയാണ് പ്രേക്ഷകരുടെ ഇടയിൽ ഉണ്ടാക്കിയിരിക്കുന്നത്.
