മലയാളി പ്രേക്ഷകർ ഈ വർഷം ഏറെ കാത്തിരിക്കുന്ന ഒരു ചിത്രമാണ് ആസിഫ് അലി- ജിസ് ജോയ് ടീം മൂന്നാമതും ഒന്നിച്ച വിജയ് സൂപ്പറും പൗർണ്ണമിയും എന്ന ചിത്രം. ബൈസൈക്കിൾ തീവ്സ്, സൺ‌ഡേ ഹോളീഡേ എന്നീ ചിത്രങ്ങൾക്ക് ശേഷം ഈ കൂട്ടുകെട്ട് വീണ്ടും ഒന്നിച്ചപ്പോൾ ഇവർ ലക്ഷ്യമിടുന്നതും വിജയങ്ങളുടെ ഹാട്രിക് തന്നെയാണ്. മലയാളത്തിലെ ലക്കി ടീം ആയ ആസിഫ് അലി- ജിസ് ജോയ് കൂട്ടുകെട്ടിനൊപ്പം ഇപ്പോൾ മലയാളത്തിലെ ഭാഗ്യ നായികയായ ഐശ്വര്യ ലക്ഷ്മിയും ഉണ്ട്. ഞണ്ടുകളുടെ നാട്ടിൽ ഒരിടവേള, മായാനദി, വരത്തൻ എന്നീ ചിത്രങ്ങൾക്ക് ശേഷം തുടർച്ചയായ നാലാമത്തെ വിജയം നേടിയാണ് ഐശ്വര്യ ലക്ഷ്മി എത്തുന്നത്. ഏതായാലും ഈ ചിത്രത്തിന്റെ ട്രൈലെർ നാളെ റിലീസ് ചെയ്യുകയാണ്.
ന്യൂ സൂര്യ ഫിലിമ്സിന്റെ ബാനറിൽ എ കെ സുനിൽ നിർമ്മിച്ച ഈ ചിത്രത്തിൽ ഒരു വലിയ താര നിര തന്നെ അണിനിരക്കുന്നുണ്ട്. ബാലു വർഗീസ്, ജോസഫ് അന്നംക്കുട്ടി , രഞ്ജി പണിക്കർ, സിദ്ദിഖ് , അജു വർഗീസ്, അലെൻസിയർ, ശാന്തി കൃഷ്ണ എന്നിവർ ഈ ചിത്രത്തിന്റെ ഭാഗമാണ്.അരക്കോടിയിലേറെ രൂപയ്ക്കു ഈ ചിത്രത്തിന്റെ ഓവർസീസ് റൈറ്റ്സ് വിറ്റു പോയിരുന്നു. ആസിഫ് അലിയുടെ കരിയറിൽ ആദ്യമായാണ് ഒരു ചിത്രത്തിന് ഇത്ര വലിയ തുക ഓവർസീസ് റൈറ്റ്സ് ആയി ലഭിക്കുന്നത്. പ്രിൻസ് ജോർജ് സംഗീതം സംവിധാനം നിർവഹിച്ചിരിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയത് റെനഡിവേ ആണ്. കഴിഞ്ഞ വർഷം നൂറു ദിവസം തിയേറ്ററിൽ പ്രദർശിപ്പിച്ചു വമ്പൻ വിജയം നേടിയെടുത്ത ചിത്രമായിരുന്നു ആസിഫ് അലി- ജിസ് ജോയ് ടീമിന്റെ സൺ‌ഡേ ഹോളിഡേ.
