സ്വാതന്ത്ര്യം അർദ്ധരാത്രിയിൽ എന്ന ചിത്രം ഒരുക്കി മലയാളത്തിൽ അരങ്ങേറ്റം കുറിച്ച സംവിധായകൻ ആണ് ടിനു പാപ്പച്ചൻ. ആന്റണി വർഗീസ് നായകനായി എത്തിയ ആ ചിത്രം മികച്ച വിജയമാണ് നേടിയത്. അതിനു ശേഷം ഇതേ കൂട്ടുകെട്ടിൽ പുറത്തു വന്ന ചിത്രമാണ് അജഗജാന്തരം. ഈ ക്രിസ്മസ് സീസണിൽ പുറത്തു വന്ന അജഗജാന്തരവും മികച്ച പ്രേക്ഷക പ്രതികരണം നേടി മുന്നേറുകയാണ്. ക്രിസ്മസ് റിലീസുകളിൽ ഏറ്റവും മികച്ച അഭിപ്രായവും ബോക്സ് ഓഫീസ് കളക്ഷനും നേടിയാണ് ഈ ചിത്രം മുന്നേറുന്നത്. മലയാളത്തിന്റെ സൂപ്പർ താരങ്ങളായ മോഹൻലാൽ, മമ്മൂട്ടി എന്നിവരെ വെച്ച് ടിനു സിനിമ ചെയ്യുമെന്നുള്ള വാർത്തകൾ വന്നിരുന്നു. അതിൽ തന്നെ മോഹൻലാൽ ചിത്രം ഇപ്പോൾ ചർച്ചകളിൽ ആണെന്നും ടിനു വെളിപ്പെടുത്തിയിരുന്നു. ഇപ്പോഴിതാ മെഗാ സ്റ്റാർ മമ്മൂട്ടിയെ നായകനാക്കി ഒരു ചിത്രമൊരുക്കുമോ എന്ന ചോദ്യത്തോടും പ്രതികരിക്കുകയാണ് ടിനു.
മമ്മുക്കയെ നായകനാക്കി ഒരു ചിത്രം ഒരുക്കാൻ ആഗ്രഹമുണ്ടെന്നും, അതിനു ശ്രമിച്ചിട്ടുണ്ടെന്നും ടിനു പറയുന്നു. എന്നാൽ നമ്മൾ പറയുന്ന കഥ അദ്ദേഹത്തിന് ഇഷ്ടപ്പെടാത്തത് കൊണ്ടാണ് ആ പ്രൊജക്റ്റ് നടക്കാതെ പോയതെന്നും ടിനു പറഞ്ഞു. പക്ഷെ അദ്ദേഹവുമൊത്തു ഒരു ചിത്രം ചെയ്യാനുള്ള ശ്രമങ്ങൾ ഭാവിയിലും ഉണ്ടാകുമെന്നും ടിനു പാപ്പച്ചൻ പറഞ്ഞു. മോഹൻലാലിനെ നായകനാക്കി ഒരുക്കാൻ ആഗ്രഹിക്കുന്ന ചിത്രം ഒരു മിസ്റ്ററി നിറഞ്ഞ കഥയാണ് എന്നും അതിനെ കുറിച്ച് കൂടുതൽ ഒന്നും പറയാറായില്ല എന്നും ടിനു വെളിപ്പെടുത്തി. ലാലേട്ടനോട് കഥ പറഞ്ഞിട്ടുണ്ടെന്നും ടിനു മാധ്യമങ്ങളോട് പറഞ്ഞിരുന്നു. ഒരു സഹസംവിധായകൻ എന്ന നിലയിൽ മമ്മൂട്ടിക്കും മോഹൻലാലിനൊപ്പം പല ചിത്രങ്ങളിലും സഹകരിച്ചിട്ടുള്ള വ്യക്തി കൂടിയാണ് ടിനു. അടുത്തിടെ പൂർത്തിയായ ലിജോ ജോസ് പെല്ലിശ്ശേരി- മമ്മൂട്ടി ചിത്രത്തിൽ സഹസംവിധായകൻ ആയി ജോലി ചെയ്തതും ടിനു ആയിരുന്നു.
