മലയാളത്തിന്റെ മഹാനടൻ മോഹൻലാൽ നായകനായി എത്തുന്ന ഏറ്റവും പുതിയ ചിത്രമാണ് ബ്രോ ഡാഡി. ലൂസിഫർ എന്ന ബ്ലോക്ക്ബസ്റ്റർ ചിത്രത്തിന് ശേഷം പൃഥ്വിരാജ് സുകുമാരൻ സംവിധാനം ചെയ്ത ഈ ചിത്രം, നേരിട്ടുള്ള ഒറ്റിറ്റി റിലീസ് ആയാണ് എത്തുന്നത്. ഡിസ്‌നി പ്ലസ് ഹോട്ട് സ്റ്റാർ റിലീസ് ആയി ഈ വരുന്ന ജനുവരി ഇരുപത്തിയാറിനു ഈ ചിത്രം റിലീസ് ചെയ്യും. ഇതിനു മുൻപ് നേരിട്ട് ഒറ്റിറ്റി റിലീസ് ആയി എത്തിയ മോഹൻലാൽ ചിത്രം ജീത്തു ജോസഫ് ഒരുക്കിയ ദൃശ്യം 2 ആയിരുന്നു. കഴിഞ്ഞ വർഷം ഫെബ്രുവരിയിൽ ആമസോൺ പ്രൈം റിലീസ് ആയി എത്തിയ ദൃശ്യം 2 പാൻ ഇന്ത്യ തലത്തിൽ വമ്പൻ വിജയമാണ് നേടിയത്. മാത്രമല്ല, ആഗോള തലത്തിൽ വരെ ശ്രദ്ധിക്കപ്പെട്ട ഈ ചിത്രം മലയാള സിനിമ കണ്ട ഏറ്റവും വലിയ ഒറ്റിറ്റി ബ്ലോക്ക്ബസ്റ്റർ ആയി മാറി. നിലവിൽ മോഹൻലാൽ തന്നെ നായകനായ മരക്കാർ കഴിഞ്ഞാൽ ഏറ്റവും വലിയ ഒറ്റിറ്റി റൈറ്റ്സ് സ്വന്തമാക്കിയ ചിത്രവും ദൃശ്യം 2 ആണ്. ഇപ്പോഴിതാ, ആമസോണിനു ശേഷം ഹോട്ട് സ്റ്റാറിലും തന്റെ ചിത്രവുമായി എത്തുമ്പോൾ ആ വിജയം ആവർത്തിക്കാനുള്ള ഒരുക്കത്തിലാണ് മോഹൻലാൽ.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ബ്രോ ഡാഡിയിൽ പൃഥ്വിരാജ് സുകുമാരനും പ്രധാന വേഷം ചെയ്യുന്നുണ്ട്. ജോൺ കാറ്റാടി, ഈശോ ജോൺ കാറ്റാടി എന്ന് പേരുള്ള കഥാപാത്രങ്ങളായി അച്ഛനും മകനും ആയാണ് മോഹൻലാൽ- പൃഥ്വിരാജ് ടീം ഇതിൽ അഭിനയിച്ചിരിക്കുന്നത്. ഇതിന്റെ ടീസർ, ട്രൈലെർ, ഇതിൽ രണ്ടു ഗാനങ്ങൾ, അതുപോലെ ഇതിലെ മൂന്നു പ്രൊമോഷൻ വീഡിയോകൾ എന്നിവ ഇപ്പോൾ സോഷ്യൽ മീഡിയയിൽ വമ്പൻ ഹിറ്റാണ്. അതിൽ തന്നെ മോഹൻലാൽ- പൃഥ്വിരാജ് എന്നിവർ ചേർന്ന് പാടിയ ഗാനത്തിന് വലിയ സ്വീകരണമാണ് ലഭിക്കുന്നത്. മീന, കല്യാണി പ്രിയദർശൻ, ലാലു അലക്സ്, കനിഹ, ഉണ്ണി മുകുന്ദൻ, സൗബിൻ ഷാഹിർ, ജാഫർ ഇടുക്കി, ജഗദീഷ്, മല്ലിക സുകുമാരൻ തുടങ്ങി ഒരു വലിയ താരനിര തന്നെ അണിനിരക്കുന്ന ഈ ചിത്രത്തിന് സംഗീതമൊരുക്കിയത് ദീപക് ദേവ് ആണ്.
