ലേഡി സൂപ്പർ സ്റ്റാർ മഞ്ജു വാര്യരെ നായികയാക്കി സന്തോഷ് ശിവൻ രചിച്ചു സംവിധാനം ചെയ്ത ചിത്രമാണ് ജാക്ക് ആൻഡ് ജിൽ. സന്തോഷ് ശിവനൊപ്പം അജിൽ എസ് എം കൂടി ചേർന്ന് രചിച്ച ഈ ചിത്രം സയൻസ് ഫിക്ഷനും, കോമെഡിയും, ആക്ഷനുമെല്ലാമിടകലർത്തിയ ഒരു കംപ്ലീറ്റ് ഫൺ ഫിലിമാണ്. ഇന്നലെ റിലീസ് ചെയ്ത ഈ ചിത്രത്തിന് ഇപ്പോൾ മികച്ച പ്രേക്ഷക പ്രതികരണമാണ് ലഭിച്ചു കൊണ്ടിരിക്കുന്നത്. കുടുംബ പ്രേക്ഷകരും കുട്ടികളുമാണ് ഈ ചിത്രത്തിന് കൂടുതലായി എത്തിച്ചേരുന്നത്. രസകരമായ ഒരു പരീക്ഷണ ചിത്രം കൂടിയായ ജാക്ക് ആൻഡ് ജിൽ മലയാളി പ്രേക്ഷകർ ഇരു കയ്യും നീട്ടി സ്വീകരിച്ചു എന്നതിന് തെളിവാണ് ഇപ്പോൾ ഈ ചിത്രത്തിന് തീയേറ്ററുകളിൽ കിട്ടുന്ന ജന പിന്തുണ. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ, സന്തോഷ് ശിവൻ, എം പ്രശാന്ത് ദാസ് എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്.
മാനസികമായി നോർമലല്ലാത്ത ആളുകളെ തിരിച്ചു മാനസിക സൗഖ്യത്തിലേക്ക് കൊണ്ടു വരാൻ സഹായിക്കുന്ന ഒരു കണ്ടു പിടിത്തം കേശവനെന്നു പേരുള്ള ഒരു യുവ ശാസ്ത്രജ്ഞൻ നടത്തുന്നതും, പിന്നീട് അത് മനുഷ്യരിൽ പരീക്ഷിക്കാൻ ശ്രമിക്കുന്നതും, ആ പരീക്ഷണത്തിന്റെ ഭാഗമായി മഞ്ജു വാര്യർ അവതരിക്കുന്ന പാർവതിയെന്ന കഥാപാത്രത്തിൽ ഈ പരീക്ഷണം നടത്തുന്നതുമാണ് ചിത്രം കാണിച്ചു തരുന്നത്. പിന്നീട് സംഭവിക്കുന്ന കാര്യങ്ങൾ വളരെ രസകരമായും ആവേശകരമായുമാണ് അവതരിപ്പിച്ചിരിക്കുന്നത്. സന്തോഷ് ശിവൻ തന്നെ ക്യാമറ ചലിപ്പിച്ച ഈ ചിത്രത്തിന് സംഗീതമൊരുക്കിയത് റാം സുരീന്ദർ, ഗോപി സുന്ദർ, ജേക്സ് ബിജോയ് എന്നിവർ ചേർന്നാണ്. സാങ്കേതികമായി മികച്ച നിലവാരം പുലർത്തുന്ന ഈ ചിത്രം സെന്റിമീറ്ററെന്ന പേരിൽ തമിഴിലുമൊരുക്കിയിട്ടുണ്ട്.
