പാൻ ഇന്ത്യൻ സൂപ്പർ താരമായ പ്രഭാസ് ഒരിക്കൽ കൂടി തന്റെ താരമൂല്യം കാണിച്ചു തന്നിരിക്കുകയാണ്. കഴിഞ്ഞ ദിവസം റിലീസ് ചെയ്ത അദ്ദേഹം നായകനായ രാധേ ശ്യാം എന്ന ബ്രഹ്മാണ്ഡ റൊമാന്റിക് ചിത്രം സമ്മിശ്ര പ്രതികരണങ്ങൾക്കു ഇടയിലും വമ്പൻ ഓപ്പണിങ് ആണ് നേടിയിരിക്കുന്നത്. കോവിഡ് പ്രതിസന്ധിക്കു ശേഷം വന്ന ഇന്ത്യൻ ചിത്രങ്ങളിൽ ഏറ്റവും വലിയ ഓപ്പണിങ് ആണ് രാധേ ശ്യാം നേടിയെടുത്തത്. ട്രേഡ് അനലിസ്റ്റുകൾ പുറത്തു വിട്ട റിപ്പോർട്ടുകൾ പ്രകാരം 79 കോടി രൂപയാണ് ഈ ചിത്രം നേടിയത്. ഒരു ഇന്ത്യൻ സിനിമയുടെ ഏറ്റവും വലിയ വിദേശ റിലീസ് ആയ ഈ ചിത്രം ഓവർസീസ് മാർക്കറ്റിലും വലിയ കളക്ഷൻ ആണ് നേടിയത്. ആന്ധ്ര – തെലുങ്കാന മാർക്കറ്റിലും ചിത്രം കിടിലൻ കളക്ഷൻ ആണ് നേടിയെടുക്കുന്നത്. ഒരു റൊമാന്റിക് ത്രില്ലർ ആയി ഒരുക്കിയ ഈ ചിത്രം ഒരു ദൃശ്യാനുഭവം എന്ന നിലയിൽ മികച്ച തീയേറ്റർ അനുഭവമാണ് സമ്മാനിക്കുന്നത് എന്ന് ആരാധകർ പറയുന്നു.
പൂജ ഹെഗ്‌ഡെ നായികാ വേഷം ചെയ്തിരിക്കുന്ന ഈ ചിത്രം യുവി ക്രിയേഷന്‍, ടി – സീരീസ് എന്നീ ബാനറില്‍ ഭൂഷണ്‍ കുമാര്‍, വാംസി, പ്രമോദ് എന്നിവര്‍ ചേർന്നാണ് നിർമ്മിച്ചിരിക്കുന്നത്. മെഗാ ബഡ്ജറ്റില് ഒരുക്കിയ ഈ റൊമാന്റിക് ചിത്രം രചിച്ചു സംവിധാനം ചെയ്തത് രാധ കൃഷ്ണ കുമാർ ആണ്. ഭാഗ്യശ്രീ, കൃഷ്ണം രാജു, സത്യരാജ്, ജഗപതി ബാബു, സച്ചിന്‍ ഖേദേക്കര്‍, പ്രിയദര്‍ശി, മുരളി ശര്‍മ, സാശാ ചേത്രി, കുനാല്‍ റോയ് കപൂര്‍, മലയാള താരം ജയറാം എന്നിവരും ഈ ചിത്രത്തിന്റെ താരനിരയിൽ ഉണ്ട്. മനോജ് പരമഹംസ ഒരുക്കിയ ദൃശ്യങ്ങൾ മനോഹരമാണ്. കോട്ടഗിരി വെങ്കിടേശ്വര റാവു ആണ് ചിത്രത്തിന്റെ എഡിറ്റർ.
