പിസ്ത സുമ കിരാക്കു ശേഷം വീണ്ടുമൊരു അൽഫോൻസ് പുത്രൻ- രാജേഷ് മുരുഗേശൻ ട്രെൻഡ് പാട്ട്; ഗോൾഡിലെ പുത്തൻ ഗാനം ഇതാ

അൽഫോൻസ് പുത്രൻ സംവിധാനം ചെയ്ത ഗോൾഡ് എന്ന ചിത്രം ഇന്ന് പ്രേക്ഷകരുടെ മുന്നിലെത്തിക്കഴിഞ്ഞു. രാവിലെ പത്ത് മണി തൊട്ട് കേരളത്തിലെ സ്‌ക്രീനുകളിൽ ഈ ചിത്രത്തിന്റെ പ്രദർശനം ആരംഭിച്ചു. പ്രേക്ഷകർ ഏറെ ആവേശത്തോടെ കാത്തിരുന്ന ഈ ചിത്രം അൽഫോൻസ് പുത്രൻ ചിത്രമെന്ന പേരിൽ തന്നെ സോഷ്യൽ മീഡിയയിൽ വലിയ ഓളമാണ് ഉണ്ടാക്കിയത്. ആ ഹൈപ്പ് കൂട്ടുന്ന ഒരു ഗാനവും ഇന്നലെ രാത്രി ഇതിന്റെ അണിയറ പ്രവർത്തകർ പുറത്ത് വിട്ടു. ഒരു പ്രോമോ ഗാനമാണ്‌ അവർ റിലീസ് ചെയ്തത്. തന്നെ തന്നെ എന്ന വരികളോടെ തുടങ്ങുന്ന ഈ അടിച്ചു പൊളി ഗാനം റിലീസ് ചെയ്ത നിമിഷം മുതൽ സോഷ്യൽ മീഡിയയിൽ ട്രെൻഡാണ്. നേരം, പ്രേമം എന്നീ ചിത്രങ്ങളിൽ അൽഫോൻസ് പുത്രൻ അവതരിപ്പിച്ചു വിജയിപ്പിച്ച അതേ സ്റ്റൈലിൽ തന്നെയാണ് ഈ ഗാനവും പ്രേക്ഷകരുടെ മുന്നിൽ എത്തിയിരിക്കുന്നത്.

പൃഥ്വിരാജ് സുകുമാരൻ, ദീപ്തി സതി എന്നിവർ നൃത്തം വെക്കുന്ന ഈ ഗാനത്തിൽ ഇതിലെ ഡാൻസ് മാസ്റ്റേഴ്സിനെയും നമ്മുക്ക് കാണാം. വിക്രം ഫെയിം വാസന്തിയും ഈ ഗാനത്തിൽ ചുവടു വെക്കുന്നുണ്ട്. ചിത്രത്തിന്റെ മേക്കിങ് കൂടെ ഈ ഗാനത്തിൽ ചെറുതായി നമ്മുക്ക് കാണാൻ സാധിക്കും, ശബരീഷ് വർമ്മ വരികൾ രചിച്ച ഈ ഗാനത്തിന് ഈണം പകർന്നത് രാജേഷ് മുരുകേശനാണ്. വിജയ് യേശുദാസും, രാജേഷ് മുരുകേശനും ചേർന്ന് ആലപിച്ച ഈ ഗാനം യുവാക്കൾക്കിടയിൽ ട്രെൻഡായി മാറുമെന്നുള്ള സൂചനയാണ് ഇപ്പോൾ ലഭിക്കുന്നത്. റിലീസ് ചെയ്ത് 12 മണിക്കൂർ കഴിയുമ്പോൾ തന്നെ ഏകദേശം എട്ട് ലക്ഷത്തോളം കാഴ്ചക്കാരെയാണ് ഈ ഗാനത്തിന് യൂട്യൂബിൽ നിന്നും ലഭിച്ചിരിക്കുന്നത്. പൃഥ്വിരാജ് സുകുമാരൻ- നയൻ‌താര എന്നിവരാണ് ഗോൾഡിലെ പ്രധാന വേഷങ്ങൾ ചെയ്യുന്നത്.