വമ്പൻ ആക്ഷൻ രംഗങ്ങളുമായി ഷാരൂഖ് ഖാന്റെ പത്താൻ വരുന്നു; റിലീസ് തീയതിയുമായി പുത്തൻ പോസ്റ്റർ

ബോളിവുഡിന്റെ കിംഗ് ഖാൻ എന്നറിയപ്പെടുന്ന ഷാരൂഖ് ഖാൻ നായകനായി എത്തുന്ന പുതിയ ചിത്രമാണ് പത്താൻ. സിദ്ധാർഥ് ആനന്ദ് ഒരുക്കിയ ഈ ചിത്രത്തിന്റെ ഒഫീഷ്യൽ റിലീസ് ഡേറ്റ് പുറത്തു വിട്ടു കൊണ്ടുള്ള വീഡിയോ, അതിന് ശേഷം വന്ന ഇതിന്റെ ഒഫീഷ്യൽ ടീസർ എന്നിവ സോഷ്യൽ മീഡിയയിൽ വമ്പൻ ഹിറ്റായി മാറിയിരുന്നു. ഒരു മെഗാ മാസ്സ് ആക്ഷൻ ചിത്രമായാണ് പത്താൻ വരുന്നതെന്ന സൂചനയാണ് ഇതിന്റെ ടീസർ നമ്മുക്ക് നൽകിയത്. അടുത്ത വർഷം ജനുവരി 25 നാണ് പത്താൻ റിലീസ് ചെയ്യാൻ പോകുന്നത്. റിലീസ് തീയതി കൂടി ഉൾപ്പെടുത്തിക്കൊണ്ട് പത്താന്റെ പുതിയ പോസ്റ്റർ പങ്ക് വെച്ചിരിക്കുകയാണ് ഷാരൂഖ് ഖാൻ. മാസ്സ് ആക്ഷൻ ഹീറോ ലുക്കിൽ ഒരു സ്പൈ ആയാണ് ഷാരൂഖ് ഖാൻ ഇതിൽ അഭിനയിച്ചിരിക്കുന്നത്. ബോളിവുഡ് സൂപ്പർ താരം ജോൺ എബ്രഹാം വില്ലനായി എത്തുന്ന പത്താനിൽ ദീപിക പദുക്കോൺ ആണ് നായികാ വേഷം ചെയ്തിരിക്കുന്നത്.

കിംഗ് ഖാന്റെ വമ്പൻ തിരിച്ചു വരവായിരിക്കും ഈ ചിത്രമെന്നാണ് ആരാധകരും സിനിമാ പ്രേമികളും പ്രതീക്ഷിക്കുന്നത്. യാഷ് രാജ് ഫിലിംസ് നിർമ്മിക്കുന്ന ഈ ചിത്രം അവരുടെ അന്പതാമത്തെ നിർമ്മാണ സംരംഭം കൂടിയാണെന്ന പ്രത്യേകതയുമുണ്ട്. സൂപ്പർ താരം സൽമാൻ ഖാൻ, ടൈഗർ എന്ന തന്റെ പ്രശസ്ത സ്പൈ കഥാപാത്രമായി പത്താനിൽ അതിഥി വേഷത്തിലെത്തുന്നുണ്ടെന്നതാണ് ഈ ചിത്രത്തിന്റെ മറ്റൊരു ഹൈലൈറ്റ്. വാർ എന്ന സൂപ്പർ ഹിറ്റ് ഹൃത്വിക് റോഷൻ- ടൈഗർ ഷെറോഫ് ചിത്രത്തിന് ശേഷം സിദ്ധാർത്ഥ് ആനന്ദ് സംവിധാനം ചെയ്‌ത പത്താൻ, ഹിന്ദി കൂടാതെ തമിഴ്, തെലുങ്ക് ഭാഷകളിലും റിലീസ് ചെയ്യും.