വെള്ളിത്തിരയിൽ തീ പടർത്താൻ ആക്ഷൻ സൂപ്പർ സ്റ്റാർ വീണ്ടും; പാപ്പൻ ട്രൈലെർ കാണാം

മലയാളത്തിന്റെ ആക്ഷൻ സൂപ്പർ സ്റ്റാർ സുരേഷ് ഗോപി നായകനായി എത്തുന്ന ഏറ്റവും പുതിയ ചിത്രമായ പാപ്പൻ വരുന്ന ജൂലൈ 29 നു റിലീസ് ചെയ്യാൻ പോവുകയാണ്. അതിനെ ഭാഗമായി ഇന്ന് ഈ ചിത്രത്തിന്റെ ട്രൈലെർ ലോഞ്ച് ചെയ്തു. കൊച്ചിയിലെ ലുലു മാളിൽ നടന്ന ചടങ്ങിലാണ് ട്രൈലെർ ലോഞ്ച് ചെയ്തത്. സുരേഷ് ഗോപി, ഗോകുൽ സുരേഷ് ഗോപി, നൈല ഉഷ, നീത പിള്ള, തുടങ്ങി ഒട്ടേറെ താരങ്ങൾ പങ്കെടുത്ത ചടങ്ങിന് വമ്പൻ പ്രേക്ഷക പിന്തുണയാണ് ലഭിച്ചത്. ഗംഭീരമായ ട്രെയ്‌ലറാണ് ഇപ്പോൾ പാപ്പൻ ടീം പുറത്തു വിട്ടിരിക്കുന്നത്. ഇതോടെ തന്നെ ചിത്രത്തിന്റെ ഹൈപ്പ് കൂടിയെന്ന് മാത്രമല്ല, ചിത്രത്തെ കുറിച്ചുള്ള പ്രേക്ഷക പ്രതീക്ഷകൾ ആകാശം മുട്ടിക്കഴിഞ്ഞു. സുരേഷ് ഗോപിയുടെ കിടിലൻ ഡയലോഗുകളും ആക്ഷനുമാണ് ഈ ട്രെയ്ലറിന്റെ ഹൈലൈറ്റ്. എബ്രഹാം മാത്യു മാത്തൻ എന്ന പോലീസ് കഥാപാത്രമായി പ്രേക്ഷകരെ ത്രസിപ്പിക്കാൻ തന്നെയാണ് ആക്ഷൻ സൂപ്പർ സ്റ്റാർ എത്തുന്നത്.

മാസ്റ്റർ ഡയറക്ടർ ജോഷി സംവിധാനം ചെയ്തിരിക്കുന്ന ഈ ചിത്രം, ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും, ശ്രീ ഗോകുലം മൂവീസിന്റെയും ബാനറിൽ യഥാക്രമം ഡേവിഡ് കാച്ചപ്പിള്ളിയും റാഫി മതിരയും ഗോകുലം ഗോപാലനും ചേർന്നാണ് നിർമ്മിച്ചിരിക്കുന്നത്. ആർ ജെ ഷാൻ രചിച്ച ഈ ചിത്രത്തിൽ നൈല ഉഷ, നീത പിള്ളൈ, ഗോകുൽ സുരേഷ് ഗോപി, ആശ ശരത്, കനിഹ, മാളവിക മേനോൻ, വിജയ രാഘവൻ, ടിനി ടോം, ഷമ്മി തിലകൻ, ശ്രീജിത്ത് രവി, മാല പാർവതി, സാധിക വേണുഗോപാൽ, അഭിഷേക് രവീന്ദ്രൻ, ചന്ദുനാഥ്, ഡയാന ഹമീദ്, ജുവൽ മേരി തുടങ്ങി ഒരു വമ്പൻ താരനിര തന്നെ അണിനിരന്നിട്ടുണ്ട്. ഈ ചിത്രം എഡിറ്റ് ചെയ്തത് ശ്യാം ശശിധരനും ഇതിനു സംഗീതമൊരുക്കിയത് ജേക്സ് ബിജോയിയും ആണ്. അജയ് ഡേവിഡ് കാച്ചപ്പിള്ളിയാണ് ഇതിന്റെ ക്യാമറാമാൻ.