കുഞ്ചാക്കോ ബോബൻ ചിത്രം ശിക്കാരി ശംഭുവിലെ ആദ്യ ഗാനം എത്തി..

ഒാര്‍ഡിനറി, മധുര നാരങ്ങ എന്നീ ഹിറ്റ് ചിത്രങ്ങളുടെ സംവിധായകൻ സുഗീതും കുഞ്ചാക്കോ ബോബനും ഒന്നിക്കുന്ന ചിത്രമാണ് ശിക്കാരി ശംഭു. സാക്ഷാൽ ശിക്കാരി ശംഭുവിനെ പോലെ തന്നെ അബദ്ധത്തിൽ ഓരോ കാര്യങ്ങൾ ചെയ്‌ത്‌ വിജയിക്കുന്ന കഥാപാത്രമാണ് ഈ ചിത്രത്തിലെ കുഞ്ചാക്കോ ബോബൻ അവതരിപ്പിക്കുന്ന പീലിപ്പോസ്. മലയാളികളുടെ പ്രിയ നായികയായ ശിവദയാണ് ഈ ചിത്രത്തിൽ നായികയായി എത്തുന്നത്. ശിവദ ആദ്യമായി കുഞ്ചാക്കോ ബോബന്റെ നായികയാകുന്ന ചിത്രം കൂടിയാണിത്. ചിത്രത്തിലെ ആദ്യത്തെ ഗാനം ഇപ്പോൾ പുറത്തുവിട്ടിരിക്കുകയാണ് അണിയറ പ്രവർത്തകർ.

കട്ടപ്പനയിലെ ഹൃത്വിക് റോഷൻ എന്ന സിനിമയിലൂടെ നായകനായ വിഷ്‌ണു ഉണ്ണികൃഷ്‌ണൻ ചാക്കോച്ചനോടൊപ്പം ഈ ചിത്രത്തിൽ പ്രധാനവേഷത്തിലെത്തുന്നു. പ്രശസ്‌ത തമിഴ് സിനിമ നിർമ്മാതാവ് ആർ കെ സുരേഷ് ഈ ചിത്രത്തിൽ വില്ലൻ വേഷത്തിലൂടെ മലയാളത്തിലേക്ക് എത്തുന്നു എന്നതും മറ്റൊരു പ്രേത്യേകതയാണ്.

നിഷാദ് കോയയാണ് ശിക്കാരി ശംഭുവിന്റെ സംഭാഷണവും തിരക്കഥയും ഒരുക്കുന്നത്. അബ്ബാസും രാജു ചന്ദ്രയും ചേര്‍ന്നാണ് കഥ ഒരുക്കുന്നത്. ചിത്രത്തിന്റെ ഛായാഗ്രഹണം നിർവഹിക്കുന്നത് ഫൈസല്‍ അലിയാണ്. ഏഞ്ചൽ മറിയ സിനിമാസന്റെ ബാനറിൽ എസ് കെ ലോറൻസാണ് ചിത്രം നിർമ്മിക്കുന്നത്