ദൈവമേ കൈ തൊഴാം കെ കുമാറാകണം മോഷൻ പോസ്റ്റർ റിലീസ് ചെയ്തു മമ്മൂട്ടി..!

പ്രശസ്ത നടനായ സലിം കുമാർ ജയറാമിനെ നായകനാക്കി സംവിധാനം ചെയ്ത ചിത്രം ആണ് ദൈവമേ കൈ തൊഴാം കെ കുമാറാകണം. ഇപ്പോൾ പോസ്റ്റ് പ്രൊഡക്ഷന്റെ ഫൈനൽ സ്റ്റേജിലുള്ള ഈ ചിത്രം ജനുവരി 12 നു തീയേറ്ററുകളിൽ എത്തുമെന്നാണ് പുതിയ റിപ്പോർട്ടുകൾ പറയുന്നത്. ഈ ചിത്രത്തിന്റെ ആദ്യ മോഷൻ പോസ്റ്റർ റിലീസ് ചെയ്തത് മെഗാ സ്റ്റാർ മമ്മൂട്ടിയാണ് . തന്റെ ഫേസ്ബുക് പേജിലൂടെയാണ് മമ്മൂട്ടി ഈ ചിത്രത്തിന്റെ മോഷൻ പോസ്റ്റർ റിലീസ് ചെയ്തത്. ചിത്രത്തിന്റെ പേര് പോലെ തന്നെ വളരെ രസകരമായ ഒരു മോഷൻ പോസ്റ്റർ ആണ് അണിയറ പ്രവർത്തകർ പുറത്തു വിട്ടിരിക്കുന്നത്. മീശ മാധവൻ എന്ന സൂപ്പർ ഹിറ്റ് ലാൽ ജോസ്- ദിലീപ് ചിത്രത്തിലെ സലിം കുമാർ അവതരിപ്പിച്ച അഡ്വക്കേറ്റ് മുകുന്ദനുണ്ണി എന്ന കഥാപാത്രത്തിന്റെ ഒരു സൂപ്പർ ഹിറ്റ് ഡയലോഗും മോഷൻ പോസ്റ്ററിൽ രസകരമായ രീതിയിൽ ഉൾപ്പെടുത്തിയിട്ടുണ്ട്.

സലിം കുമാർ സംവിധാനം ചെയ്യുന്ന ആദ്യത്തെ കമ്പ്ലീറ്റ് എന്റെർറ്റൈനെർ ആണ് ഈ ചിത്രം. ഇതിനു മുൻപ് സലിം കുമാർ ഒരുക്കിയ രണ്ടു ചിത്രവും ഓഫ്‌ബീറ്റ്‌ ചിത്രങ്ങൾ ആയിരുന്നു. കംപാർട്മെന്റ്, കറുത്ത ജൂതൻ എന്നിവയായിരുന്നു ആ ചിത്രങ്ങൾ. ശ്രീനിവാസൻ, നെടുമുടി വേണു, ഇന്ദ്രൻസ്, കൊച്ചു പ്രേമൻ, ഹരിശ്രീ അശോകൻ, കോട്ടയം പ്രദീപ് , ശിവജി ഗുരുവായൂർ, അഞ്ജലി അനീഷ് ഉപാസന , സുരഭി ലക്ഷ്മി, എന്നിവരും അഭിനയിക്കുന്ന ഈ ചിത്രത്തിൽ നായികാ വേഷത്തിൽ എത്തുന്നത് അനുശ്രീ ആണ്. പ്രയാഗ മാർട്ടിനും ഈ ചിത്രത്തിൽ പ്രത്യക്ഷപ്പെടുന്നുണ്ട്. അനന്യ ഫിലിംസിന്റെ ബാനറില്‍ ആല്‍വിന്‍ ആന്റണിയും യുണൈറ്റഡ് ഗ്ലോബല്‍ മീഡിയയുടെ ബാനറില്‍ ഡോ സഖറിയ തോമസും ചേര്‍ന്നാണ് ഈ ചിത്രം നിർമ്മിക്കുന്നത്. നാദിര്ഷയാണ് ഈ ചിത്രത്തിന് സംഗീതം പകർന്നിരിക്കുന്നത്.