ചിത്രത്തിനായി മമ്മൂട്ടി പേര് കണ്ടെത്തിയത് പരോൾ ഗാനത്തിലൂടെയെന്ന് സംവിധായകൻ

മമ്മൂട്ടിയെ നായകനാക്കി ശരത് സന്ദിത് സംവിധാനം ചെയ്യുന്ന ‘പരോൾ’ എന്ന ചിത്രം അണിയറയിൽ ഒരുങ്ങുകയാണ്. പരസ്യസംവിധായകനായ ശരതിന്റെ സിനിമാലോകത്തേക്കുള്ള ആദ്യ ചുവടുവെപ്പാണ് ഈ ചിത്രം. ‘പരോൾ’ എന്ന പേര് ചിത്രത്തിനായി നിർദേശിച്ചത് മമ്മൂട്ടിയാണെന്ന് വെളിപ്പെടുത്തിയിരിക്കുകയാണ് സംവിധായകൻ. ചിത്രീകരണം തുടങ്ങുന്ന സമയത്തൊന്നും സിനിമയുടെ പേര് തീരുമാനിച്ചിരുന്നില്ല. ചിത്രീകരണത്തിനായി എത്തിയപ്പോൾ ‘പരോളി’ലെ ഗാനങ്ങള്‍ മമ്മൂട്ടി കേട്ടിരുന്നു. അപ്പോഴാണ് നടനും ഗായകനുമായ അരിസ്റ്റോ സുരേഷ് പാടിയ ‘പരോള്‍ …’ എന്നുതുടങ്ങുന്ന ഗാനം അദ്ദേഹത്തിൻറെ ശ്രദ്ധയിൽപെട്ടത്. ഉടന്‍ തന്നെ മമ്മൂട്ടി ക്ലാപ്പ് ബോര്‍ഡ് വാങ്ങി അതില്‍ പരോള്‍ എന്ന് എഴുതുകയായിരുന്നുവെന്ന് ശരത് പറയുന്നു.

ഏറെ നാളുകൾക്ക് ശേഷം മമ്മൂട്ടി തനി നാടന്‍ കഥാപാത്രമായി എത്തുന്ന ചിത്രമാണ് ‘പരോൾ’. ഇനിയ, മിയ, സിദ്ദിഖ്, സുരാജ് തുടങ്ങിയവരാണ് ചിത്രത്തിലെ പ്രധാനകഥാപാത്രങ്ങളെ അവതരിപ്പിക്കുന്നത്. മമ്മൂട്ടിയുടെ ഭാര്യയുടെ വേഷത്തിലാണ് ഇനിയ എത്തുന്നത്. ബാഹുബലിയിലെ കാലകേയനെ അവതരിപ്പിച്ച തെലുങ്കു നടന്‍ പ്രഭാകര്‍ ചിത്രത്തിലെ ഒരു മുഖ്യറോൾ അവതരിപ്പിക്കുന്നു. രണ്ടു ഷെഡ്യൂളിലായി ബംഗളൂരുവിലും കേരളത്തിലുമായി ചിത്രത്തിന്റെ ഷൂട്ടിങ് പൂർത്തിയായിരിക്കുകയാണ്. അജിത്ത് പൂജപ്പുരയാണ് ചിത്രത്തിന് തിരക്കഥയൊരുക്കിയിരിക്കുന്നത്. ജെ & ജെ പ്രൊഡക്ഷൻസിന്റെ ബാനറിൽ ജൂഡ് സുധീർ, ജൂബി നൈനാൻ എന്നിവർ ചേർന്നാണ് ‘പരോൾ’ നിർമ്മിക്കുന്നത്. മാർച്ചിൽ ചിത്രം തിയറ്ററുകളിൽ എത്തുമെന്നാണ് പ്രതീക്ഷ.