അഖിൽ അക്കിനേനി- മമ്മൂട്ടി ചിത്രത്തിലെ പുത്തൻ ഗാനമെത്തി; ഗ്ലാമറസ് ലുക്കിൽ സാക്ഷി വൈദ്യയും; വീഡിയോ കാണാം

തെലുങ്ക് യുവതാരം അഖിൽ അക്കിനേനി, മലയാളത്തിന്റെ മെഗാസ്റ്റാർ മമ്മൂട്ടി എന്നിവർ പ്രധാന വേഷം ചെയ്യുന്ന തെലുങ്ക് ചിത്രമാണ് ഏജന്റ്. വൈ എസ് രാജശേഖര റെഡ്ഢിയുടെ ജീവിത കഥ പറഞ്ഞ യാത്ര എന്ന ചിത്രത്തിന് ശേഷം മമ്മൂട്ടി വേഷമിട്ട ഈ തെലുങ്ക് ചിത്രം രചിച്ചു സംവിധാനം ചെയ്തിരിക്കുന്നത് സൂപ്പർ ഹിറ്റ് സംവിധായകനായ സുരീന്ദർ റെഡ്ഢിയാണ്. ഈ വരുന്ന ഏപ്രിൽ 28 നാണു ഏജന്റ് റിലീസ് ചെയ്യുക. റിലീസ് തീയതി പുറത്തു വിട്ടു കൊണ്ടുള്ള ഇതിന്റെ ടീസർ വലിയ ഹിറ്റായി മാറിയിരുന്നു. ഇപ്പോഴിതാ ഈ ചിത്രത്തിലെ ഒരു പ്രണയ ഗാനം കൂടി പുറത്തു വന്നിരിക്കുകയാണ്. നായകൻ അഖിൽ അക്കിനേനി, നായികാ വേഷം ചെയ്യുന്ന സാക്ഷി വൈദ്യ എന്നിവരാണ് ഈ ഗാനത്തിൽ പ്രത്യക്ഷപ്പെടുന്നത്. മല്ലി മല്ലി എന്ന വരികളോടെ തുടങ്ങുന്ന ഈ ഗാനത്തിന്റെ ലിറിക് വീഡിയോയാണ് ഇപ്പോൾ റിലീസ് ചെയ്തിരിക്കുന്നത്.

സാക്ഷി വൈദ്യ ഗ്ലാമറസ് ലുക്കിൽ പ്രത്യക്ഷപ്പെടുന്ന ഈ ഗാനം രചിച്ചത് ആദിത്യ അയ്യങ്കാറും, പാടിയിരിക്കുന്നത് ഹിപ് ഹോപ് തമിഴനുമാണ്. അദ്ദേഹം തന്നെയാണ് ഈ ഗാനത്തിന് ഈണം പകർന്നിരിക്കുന്നതും. ഹോളിവുഡ് ഫിലിം സീരിസായ ജേസൺ ബോണിൽ നിന്ന് പ്രചോദനം ഉൾക്കൊണ്ട് ഒരുക്കിയിരിക്കുന്ന ഈ ചിത്രം, ഹൈദരാബാദ്, ഡൽഹി, ഹംഗറി എന്നിവിടങ്ങളിലൊക്കെയായാണ് ഷൂട്ട് ചെയ്തിരിക്കുന്നത്. എകെ എന്റർടൈൻമെന്റ്‌സിന്റെയും സുരേന്ദർ 2 സിനിമയുടെയും ബാനറിൽ രാമബ്രഹ്മം സുങ്കര നിർമ്മിച്ച ഈ ചിത്രത്തിന് ക്യാമറ ചലിപ്പിച്ചത് രാകുല്‍ ഹെരിയനും എഡിറ്റ് ചെയ്തിരിക്കുന്നത് നവീൻ നൂലിയുമാണ്. മഹാദേവ് എന്ന് പേരുള്ള ഒരു മിലിട്ടറി ഓഫീസർ ആയാണ് മമ്മൂട്ടി ഇതിൽ വേഷമിട്ടിരിക്കുന്നത്.