കണ്ണൂർ സ്‌ക്വാഡിന് ശേഷം വീണ്ടും നവാഗതനൊപ്പം മമ്മൂട്ടി; ഒരുങ്ങുന്നത് സ്റ്റൈലിഷ് ത്രില്ലർ

മലയാളത്തിന്റെ മെഗാസ്റ്റാർ മമ്മൂട്ടി ഇപ്പോൾ അഭിനയിച്ചു കൊണ്ടിരിക്കുന്നത് നവാഗതനായ റോബി വർഗീസ് രാജ് സംവിധാനം ചെയ്യുന്ന കണ്ണൂർ സ്‌ക്വാഡ് എന്ന ചിത്രത്തിലാണ്. പുണെയിലാണ്‌ ഇപ്പോൾ ഇതിന്റെ ഷൂട്ടിംഗ് നടക്കുന്നത്. മമ്മൂട്ടി ഒരു പോലീസ് ഓഫീസറായി അഭിനയിക്കുന്ന ഈ ചിത്രം, മമ്മൂട്ടി കമ്പനി എന്ന തന്റെ നിർമ്മാണ ബാനറിൽ അദ്ദേഹം തന്നെയാണ് നിർമ്മിക്കുന്നത്. ഈ ബാനറിൽ അദ്ദേഹം നിർമ്മിക്കുന്ന ഏറ്റവും വലിയ ചിത്രവുമാണ് കണ്ണൂർ സ്‌ക്വാഡ്. സണ്ണി വെയ്ൻ, ഷറഫുദീൻ, അസീസ് നെടുമങ്ങാട്, ഗായത്രി അരുൺ എന്നിവരും വേഷമിടുന്ന ഈ ചിത്രത്തിന് രചന നിർവഹിച്ചത് പ്രശസ്ത നടനായ റോണി ഡേവിഡ് രാജ് ആണ്. ഇപ്പോഴിതാ ഈ ത്രില്ലറിന് ശേഷം വീണ്ടുമൊരു നവാഗത സംവിധായകനൊപ്പം ഒന്നിക്കാൻ പോവുകയാണ് മമ്മൂട്ടി. പ്രമുഖ തിരക്കഥാകൃത്ത് കലൂര്‍ ഡെന്നിസിന്റെ മകന്‍ ഡിനോ ഡെന്നിസ് ഒരുക്കാൻ പോകുന്ന ചിത്രത്തിലാണ് മമ്മൂട്ടി ഇനി വേഷമിടുക.

മാർച്ച് അവസാനവാരം ചിത്രീകരണം ആരംഭിക്കുന്ന ഈ ചിത്രം നിർമ്മിക്കാൻ പോകുന്നത് തീയേറ്റർ ഓഫ് ഡ്രീംസിന്റെ ബാനറിൽ ജിനു എബ്രഹാം, ഡോൾവിൻ കുര്യാക്കോസ്, ഡാർവിൻ കുര്യാക്കോസ് എന്നിവരാണ്. ഒരു സ്റ്റൈലിഷ് ത്രില്ലറായാണ് ഈ ചിത്രം ഒരുക്കുക എന്നാണ് സൂചന. ഇതൊരു മൈൻഡ് ഗെയിം ത്രില്ലറായിരിക്കുമെന്നും വാർത്തകൾ വന്നിരുന്നു. കൊച്ചി, ബംഗളൂരു എന്നിവിടങ്ങളിൽ ഷൂട്ട് ചെയ്യാൻ പോകുന്ന ഈ ചിത്രത്തിന് ക്യാമറ ചലിപ്പിക്കുന്നത് നിമിഷ് രവി ആയിരിക്കും. റോഷാക്ക് ഒക്കെ പോലെ പുതിയ രീതിയിലുള്ള ഒരു സിനിമയായിരിക്കും ഈ ഡിനോ ഡെന്നിസ്- മമ്മൂട്ടി ചിത്രമെന്നാണ് ഇതിന്റെ നിർമ്മാതാക്കളിൽ ഒരാളായ ജിനു എബ്രഹാം പറയുന്നത്.