ഇന്നെന്‍ നായികയാണിവള്‍ നയന്‍താര; കൗമാര പ്രണയം നിറയുന്ന ഓ മൈ ഡാർലിംഗിലെ പുത്തൻ ഗാനം കാണാം

യുവ നായികാ താരം അനിഖ സുരേന്ദ്രൻ നായികാ വേഷം ചെയ്യുന്ന പുതിയ ചിത്രമാണ് ഓ മൈ ഡാർലിംഗ്. മലയാള സിനിമയിൽ ബാലതാരമായി അരങ്ങേറി, അതിനു ശേഷം ഒരുപിടി മലയാളം, തമിഴ് ചിത്രങ്ങളിലൂടെ വലിയ പ്രേക്ഷക ശ്രദ്ധ നേടിയ അനിഖ ആദ്യമായി മലയാളത്തിൽ നായികയായി അഭിനയിച്ച ചിത്രം കൂടിയാണിത്. നാളെ റിലീസ് ചെയ്യാൻ പോകുന്ന ഈ ചിത്രത്തിലെ പുത്തൻ വീഡിയോ ഗാനമാണ് ഇപ്പോൾ ശ്രദ്ധ നേടുന്നത്. നയൻ‌താര സോങ് എന്ന പേരിൽ പുറത്തു വന്നിരിക്കുന്ന ഈ ഗാനം രചിച്ചത് വിനായക് ശശികുമാറും ഇതിന് ഈണം പകർന്നിരിക്കുന്നത് ഷാൻ റഹ്മാനുമാണ്. കെ എസ് ഹരിശങ്കർ, കീർത്തന ശബരീഷ് എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്. അനിഖ സുരേന്ദ്രൻ, മെൽവിൻ ജി ബാബു എന്നിവർ അവതരിപ്പിച്ചിരിക്കുന്ന കഥാപാത്രങ്ങളുടെ പ്രണയമാണ് ഈ ഗാനത്തിലൂടെ പ്രേക്ഷകരുടെ മുന്നിലെത്തിച്ചിരിക്കുന്നത്.

ആഷ് ട്രീ വെഞ്ചുവേഴ്സിന്റെ ബാനറിൽ മനോജ് ശ്രീകണ്ഠ നിർമ്മിച്ചിരിക്കുന്ന ഈ ചിത്രം സംവിധാനം ചെയ്തിരിക്കുന്നത് ആൽഫ്രഡ്‌ ഡി സാമുവലാണ്. അനിഖ, മെൽവിൻ എന്നിവർ കൂടാതെ മുകേഷ്, ലെന, ജോണി ആന്റണി, മഞ്ജു പിള്ള, വിജയരാഘവന്‍, ശ്രീകാന്ത് മുരളി, നന്ദു, ഡെയ്ന്‍ ഡേവിസ്, ഫുക്രു എന്നിവരും പ്രധാന വേഷങ്ങൾ അവതരിപ്പിച്ച ഈ ചിത്രത്തിന് തിരക്കഥ രചിച്ചിരിക്കുന്നത് ജിനീഷ് കെ ജോയ് ആണ്. ഒരു പക്കാ റൊമാന്റിക് ചിത്രമായിരിക്കും ഇതെന്ന സൂചനയാണ് നേരത്തെ പുറത്തു വന്ന ഇതിന്റെ ട്രെയ്ലറും നമ്മുക്ക് നൽകിയത്. അൻസാർ ഷാ ക്യാമറ ചലിപ്പിച്ച ഓ മൈ ഡാർലിംഗ് എഡിറ്റ് ചെയ്തിരിക്കുന്നത് ലിജോ പോൾ ആണ്.